«Әр қазаққа – бір кітап!» – шетелде тұратын отандастарды қазақ тіліндегі әдебиеттермен қамтамасыз етуге, ұлттық әдеби мұраны насихаттауға және олардың тарихи Отанымен мәдени-рухани байланыстарын нығайтуға бағытталған әлеуметтік-мәдени жоба.
Акция 2022 жылы «Отандастар қоры» КеАҚ мен Қазақстан Республикасының Ұлттық академиялық кітапханасының бірлескен бастамасымен қолға алынды.
Жобаның негізгі мақсаты – шетелдегі этникалық қазақтарға қазақ халқының көркем әдебиеті, тарихы, мәдениеті мен рухани құндылықтары туралы кітаптарды жеткізу, ана тіліндегі әдебиеттердің қолжетімділігін арттыру және шетелдегі қазақ қауымдастықтарының мәдени-білім беру әлеуетін қолдау.
Акцияға жеке азаматтар, қоғамдық ұйымдар, кітапханалар, баспалар және басқа да мүдделі ұйымдар қатыса алады. Жоба аясында қазақ тіліндегі көркем әдебиет, тарихи, мәдени, танымдық және балаларға арналған кітаптар қабылданады. Бұл ретте кітаптардың жақсы сақталған, пайдалануға жарамды күйде болуы ескеріледі.
Жоба іске қосылған алғашқы кезеңде 5 000-ға жуық кітап жиналып, оның 300-ге жуығы шетелдегі отандастарға таратылды.
2023 жылғы 19–23 сәуір аралығында Астана қаласында өткен VI Еуразиялық халықаралық кітап көрме-жәрмеңкесі – Eurasian Book Fair 2023 аясында «Әр қазаққа – бір кітап!» акциясы ұйымдастырылды.
Іс-шара барысында 70-тен астам азамат бастамаға қолдау көрсетіп, кітап жинау ісіне өз үлесін қосты. Жиналған қаражат есебінен «Мазмұндама» баспасынан 30 пайыздық жеңілдікпен 50-ден астам кітап сатып алынды. Сонымен қатар, баспа тарапынан жобаға қосымша кітаптар сыйға тартылды.
2026 жылы «Әр қазаққа – бір кітап!» акциясы өз жалғасын тауып, шетелдегі отандастарға қазақ тіліндегі әдебиеттерді жеткізу бағытындағы жұмыстар жаңа серпін алды.
«Отандастар қоры» КеАҚ бастамасымен еліміздің өңірлеріндегі жергілікті атқарушы органдармен, кітапханалармен және баспалармен ынтымақтастықты кеңейту, шетелдегі қазақ қауымдастықтарына арналған кітап қорын толықтыру бойынша жұмыстар жүргізілді.
Атап айтқанда, Ақтөбе, Атырау, Ақмола, Маңғыстау, Түркістан облыстары мен Алматы қаласының жергілікті атқарушы органдары бастамаға қолдау білдіріп, қазақ тіліндегі әдебиеттерді ұсынуға дайын екендерін жеткізді.
Осылайша, 2026 жылы акция аясында «Отандастар қоры» КеАҚ-ға жалпы 379 дана кітап жеткізілді.
Жинақталған әдебиеттерді Қазақстан Республикасының шетелдегі дипломатиялық өкілдіктері, қазақ мәдени орталықтары мен қазақ қауымдастықтары арқылы шетелдегі отандастарға кезең-кезеңімен жеткізу мәселесі пысықталуда.
«Әр қазаққа – бір кітап!» акциясы шетелдегі қазақтардың ана тілі мен ұлттық әдебиетке деген қызығушылығын қолдауға, қазақ тіліндегі кітаптардың қолжетімділігін арттыруға және Қазақстан мен шетелдегі қазақ қауымдастықтары арасындағы мәдени-гуманитарлық байланыстарды нығайтуға бағытталған маңызды бастамалардың бірі болып табылады.