Шығармашылық байқау – шетелде және Қазақстан аумағында тұратын дарынды, талантты отандастар мен қандастарға арналған мәдени-білім беру жобасы. Байқаудың негізгі мақсаты – талантты жастарды анықтау және қолдау, қазақ тілін, тарихын, әдебиетін және ұлттық құндылықтарды кеңінен дәріптеу. Сонымен қатар бұл бастама қатысушылардың шығармашылық қабілетін дамытуға, ұлттық мәдениетке деген қызығушылығын арттыруға және қазақ руханиятын заманауи форматта насихаттауға бағытталған.

Байқау аясында бірнеше бағыт бойынша жарыстар ұйымдастырылады. Қатысушылар мақал-мәтелдер, Қазақстан тарихы, қазақ тілі мен әдебиеті, салт-дәстүрлер тақырыптары бойынша өз білімін көрсете алады. Сонымен бірге мәнерлеп оқу, шығарма жазу, сурет салу және домбыра орындау сияқты шығармашылық бағыттар ұсынылады. Бұл бағыттар қатысушылардың көркемдік талғамын, тілдік сауаттылығын және ұлттық өнерге деген қызығушылығын дамытуға арналған.

Заманауи форматтағы байқаулар да қамтылған. Атап айтқанда, мобилография, дәстүрлі ән, қазақша би, үздік жоба номинациялары бар. Бұдан бөлек, қазақша фильмдерге пародия, қазақша stand-up, үздік патриоттық бейнеролик және үздік фотосурет бағыттары енгізілген. Бұл номинациялар қатысушыларға өз идеяларын креативті түрде ұсынуға мүмкіндік береді.

2022ж. – 117 қатысушы
2023ж. - 641 қатысушы
2024ж. - 343 қатысушы
2025ж. - 402 қатысушы

Соңғы рет, 2025 жылы Нұрғиса Тілендиевтің 100 жылдығына орай «Әлқисса» домбыра байқауы, «Жас қазақ күнделігі» атты мобилография байқауы, Абай Құнанбайұлының 180 жылдығына арналған бұқаралық ақпарат құралдары өкілдеріне арналған «Абай мұрасы» байқауы, сонымен қатар, «OQ Startup» үздік жоба сынды байқаулар ұйымдастырылды.