Қазақстанда тұрақты тұруға және азаматтықты алуға ҚХР-дан шықпас бұрын, құжаттарды алдын ала апостильдеу керектігін хабарлаймыз!

2023 жылғы Қытай Халық Республикасы Гаагада жасалған Шетелдік ресми құжаттарды заңдастыру талабын жоятын Конвенцияға (бұдан әрі – Конвенция) қосылғанын хабарлаймыз. Конвенция ҚХР-ға қатысты 2023 жылғы қараша айында күшіне енді.

Конвенция күшіне енген сәттен бастап Қытайдың Қазақстанда пайдалану үшін беретін ресми құжаттары бұдан былай консулдық заңдастыру рәсімінен өтпейді, оның орнына Қытайда қосымша сертификаттар (апостиль) берілетін болады.

Сертификаттар (апостиль) оған елтаңбалы күміс түсті мөр бекітілген жапсырма түрінде ресімделеді (жапсырма және мөр форматы қоса берілген).

Қытайда сертификаттар (апостиль) беру бойынша уәкілетті орган - Сыртқы істер министрлігі болып табылады.

Сондай ақ, сыртқы істер кеңселері өздерінің әкімшілік аудандарында берілген ресми құжаттарға сертификаттар (апостиль) береді.

Ендігі кезекте, Қытай Халық Республикасы азаматтарының Қазақстанға келмес бұрын, құжаттарын алдын ала апостильдеуі қажет!

Қазақстанда тұрақты тұруға және азаматтықты алуға Моңғолиядан шықпас бұрын, құжаттарды алдын ала апостильдеу керектігін хабарлаймыз!

Қазақстан Республикасының мемлекеттік органдары шетел мемлекеттерінен келген азаматтардың құжаттарын міндетті түрде заңдастырылған (легализацияланған) кезде ғана қабылдайды.

Моңғолия елінің азаматтары Гаага конвенциясына сәйкес, құжаттарына апостиль қойдырып алып келген жағдайда, қайтадан заңдастыру (легализациялау) қажеттілігі жоқ.

Қазақстанға қоныс аударар алдында барлық құжаттарға (туу туралы куәлігі, паспорты, неке куәлігі, соттылығы жоқ деген анықтама) міндетті түрде апостиль қойдырып алуларыңызды сұраймыз. Болмаған жағдайда, Қазақстанға келгенде құжаттарыңызды Моңғолия Елшілігіне барып растап, одан кейін ҚР Сыртқы істеп министрлігінің Консулдық қызметінде заңдастыруларыңыз қажет болады. Ал ол, өз алдына уақыт пен қаржы шығындарын талап ететінін ескертеміз.

Қоныс аударушы этникалық қазақтар шығу еліндегі тиісті органдардан соттылығының болмауы туралы анықтаманы өзімен бірге алып келуі қажет. Анықтамада құжатты берген тұлғаның қолы қойылған және мекеменің мөрі басылған болуы керек. Анықтама шетел тілдерінде жазылған жағдайда қазақ тіліне немесе орыс тіліне аударылып, нотариуспен бекітілуі тиіс.