ЖАЛПЫ ЕРЕЖЕЛЕР

Осы Қағидалар (бұдан әрі – Қағидалар) «Білім туралы» 2007 жылғы 27 шілдедегі Қазақстан Республикасы Заңының 5-бабының 41) тармақшасына, «Мемлекеттік көрсетілетін қызметтер туралы» 2013 жылғы 15 сәуірдегі Қазақстан Республикасы Заңының 10-бабының 1) тармақшасына сәйкес әзірленді және Қазақстан Республикасының азаматтарын шетелде, оның ішінде академиялық оралымдылық (ұтқырлық) шеңберінде оқытуға жіберу тәртібін, сондай-ақ мемлекеттік қызметтер көрсету тәртібін айқындайды.

академиялық ұтқырлық – білім алушыларды немесе оқытушы-зерттеушілерді белгілі бір академиялық кезеңге: семестрге немесе оқу жылына басқа жоғары және (немесе) жоғары оқу орнынан кейінгі білім беру ұйымдарына (бұдан әрі – ЖЖОКБҰ) (ел ішінде немесе шетелде) меңгерілген білім беретін оқу бағдарламаларын міндетті түрде өзінің ЖЖОКБҰ-да кредиттер түрінде қайта тапсыра отырып немесе басқа ЖЖОКБҰ-да оқуын жалғастыру үшін ауыстыру

АКАДЕМИЯЛЫҚ ҰТҚЫРЛЫҚ ШЕҢБЕРІНДЕ ШЕТЕЛГЕ ОҚУҒА ЖІБЕРУ ТӘРТІБІ

• Білім алушыларды академиялық ұтқырлық шеңберінде шетелге оқуға жіберу:
• – республикалық бюджет қаражаты;
• – ЖЖОКБҰ-ның ақылы қызметтерді іске асыру нәтижесінде алынған табыстары;
• – жұмыс берушілердің, әлеуметтік, академиялық және ғылыми әріптестер, халықаралық және отандық қорлар және стипендиялар гранттары;
• – білім алушылардың жеке қаражаттары есебінен жүзеге асырылады.
•  
• ЖЖОКБҰ білім алушыларды жіберу кезінде іріктеу тәртібін дербес айқындайды. Республикалық бюджет қаражаты есебінен академиялық ұтқырлық шеңберінде шетелге оқуға жіберуді білім беру саласындағы уәкілетті орган және білім беру ұйымдары жүзеге асырады.
•  
• ЖЖОКБҰ бойынша орындар санын анықтау және әрбір ЖЖОКБҰ-да республикалық бюджет қаражаты есебінен жіберілетін үміткерлерді іріктеу үшін ЖЖОКБҰ-лар бойынша орындар санын анықтау және үміткерлерді іріктеу жөніндегі комиссиялар құрылады. Құрылымдық бөлімшелердің басшыларынан тұратын ЖЖОКБҰ бойынша орындар санын анықтау жөніндегі комиссияны білім беру саласындағы уәкілетті орган құрады. Үміткерлерді іріктеу жөніндегі комиссияны ЖЖОКБҰ құрамы мәслихат депутаттары мен үкіметтік емес ұйымдардың тәуелсіз сарапшыларынан, қоғам қайраткерлерінен тұратын кемінде 15 адамнан құрады. ЖЖОКБҰ бойынша орындар санын анықтау жөніндегі комиссияның төрағасы Комиссия мүшелері арасынан ашық дауыс беру жолымен Комиссия мүшелері жалпы санының көпшілік даусымен сайланады. Шешім қабылдау кезінде Төрағаны қоса алғанда Комиссияның барлық мүшелері тең дауыс беру құқығына ие. Комиссия отырысы егер оған Комиссия құрамының кемінде жартысы қатысса заңды деп есептеледі. ЖЖОКБҰ бойынша орындар санын айқындау жөніндегі комиссияның жұмысын ЖЖОКБҰ бойынша орындар санын айқындау жөніндегі комиссияның жұмысын ұйымдастыруды жүзеге асыратын білім беру саласындағы уәкілетті органның ведомстволық бағынысты заңды тұлғасы (бұдан әрі – Ұйымдастырушы) ұйымдастырады. Үміткерлерді іріктеу жөніндегі комиссияның төрағасы ЖЖОКБҰ ректоры болып табылады. Шешім қабылдау кезінде Төрағаны қоса алғанда Комиссияның барлық мүшелері тең дауыс беру құқығына ие. Үміткерлерді іріктеу жөніндегі комиссияның отырысы егер оған Комиссия құрамының кемінде жартысы қатысса заңды деп есептеледі. Бос орындар болған жағдайда ЖЖОКБҰ бойынша орындар санын анықтау жөніндегі комиссия орындарды өтінім берген ЖЖОКБҰ-лар арасында қайта бөледі. Ұйымдастырушы білім беру саласындағы уәкілетті органға ЖЖОКБҰ бойынша орындар санын анықтау жөніндегі комиссия отырысының еркін нысанда жасалған хаттамасын жібереді. Білім беру саласындағы уәкілетті орган ЖЖОКБҰ бойынша орындар санын анықтау жөніндегі комиссияның хаттамасына сәйкес бұйрық шығарады.
•  
• Білім беру саласындағы уәкілетті орган мен ЖЖОКБҰ-лар жыл басында шетелге оқуға жіберу үшін конкурс жариялайды. Үміткерлердің құжаттарын беру электрондық үкімет порталы арқылы және (немесе) ЖЖОКБҰ кеңсесі арқылы конкурс жарияланған күннен бастап 60 (алпыс) жұмыс күні ішінде жүзеге асырылады. Республикалық бюджет қаражаты есебінен академиялық ұтқырлық шеңберінде конкурсқа қатысу үшін үміткерлер осы Қағидаларға 10-қосымшаға сәйкес «Шетелде академиялық ұтқырлық шеңберінде оқу конкурсына қатысу үшін құжаттар қабылдау» мемлекеттік қызметте (бұдан әрі - академиялық ұтқырлық шеңберінде мемлекеттік қызмет) көрсетілген құжаттарды ұсынады. Академиялық ұтқырлық шеңберінде республикалық бюджет қаражаты есебінен конкурсқа қатысуға осы Қағидаларға 10-қосымшада көрсетілген құжаттарды ұсыну қазақстандық ЖЖОКБҰ-лар мен шетелдік әріптес ЖЖОКБҰ-лар арасындағы ынтымақтастық туралы халықаралық шарттарға сәйкес жүзеге асырылады. Білім алушылар конкурсқа ЖЖОКБҰ-лар арасындағы ынтымақтастық туралы халықаралық шарттар болған жағдайда қатыса алады. Үміткерлерді іріктеуді Үміткерлерді іріктеу жөніндегі комиссия осы Қағидаларға 5-қосымшада көрсетілген Халықаралық шарттар/келісімдер және академиялық ұтқырлық шеңберінде шетелде оқуға үміткерлерді іріктеу критерийлеріне (бұдан әрі – Үміткерлерді іріктеу критерийлері) сәйкес жүзеге асырады.
• Академиялық ұтқырлық шеңберінде оқуға жіберу үшін үміткерлерді іріктеу кезінде бірдей балл болған жағдайда:
• – GPA жоғары балы бар үміткерлер (Grade Point Average-грейд пойнт аверейдж-дипломның орташа балы);
• – шет тілі бойынша жоғары балы бар үміткерлер;
• – жетім балалар мен ата-анасының қамқорлығынсыз қалған студенттер;
• – бала кезінен мүгедектігі бар адамдар, мүгедектігі бар балалар;
• – көп балалы отбасылардан шыққан үміткерлер басымдыққа ие болады.

ЖЖОКБҰ-ның жауапты бөлімшесі ұсынылған құжаттардың сәйкестігін тексереді және Үміткерлерді іріктеу жөніндегі комиссияның қарауына үміткерлердің іріктеу өлшемшарттарына сәйкес үміткерлер тізімін жасайды. Үміткерлерді іріктеу жөніндегі комиссия үміткерлер ұсынған құжаттарды қарастырады және ашық дауыс беру арқылы академиялық ұтқырлық шеңберінде білім алушылардың негізгі және резервтік тізімін дайындайды.

Егер үміткер академиялық ұтқырлық аясында оқуға барудан бас тартса, оны ауыстыру резервтік тізімнің кезектігіне сәйкес жүзеге асырылады. Бас тарту туралы өтініш еркін нысанда жазылады.

Үміткерлерді іріктеу жөніндегі комиссияның отырысы еркін нысанда хаттама түрінде рәсімделеді. Үміткерлерді іріктеу жөніндегі комиссия отырысының барысында ЖЖОКБҰ-ның ресми интернет-ресурстарында не әлеуметтік желілерде онлайн-трансляция режимінде аудио-, бейнежазба жүргізіледі. Үміткерлерді іріктеу жөніндегі комиссия отырыстарының хаттамалары, аудио және бейнежазбасы конкурс аяқталған сәттен бастап кемінде бір жыл ЖЖОКБҰ мұрағатында сақталады.

ЖЖОКБҰ Үміткерлерді іріктеу жөніндегі комиссия ұсынған тізімдерге сәйкес академиялық ұтқырлық шеңберінде шетелге оқуға жіберу туралы бұйрық шығарады.

Академиялық ұтқырлық шеңберінде шетелге оқуға жіберу туралы бұйрық бекітілгеннен кейін 10 (он) жұмыс күні ішінде ЖЖОКБҰ сайтына орналастырылады. Академиялық ұтқырлық аясында оқуға жіберілетін конкурстан өткен үміткерлерді жіберу мерзімі білім алатын елінде академиялық кезеңнің басталуына сәйкес әр жағдайда бөлек анықталады.

ЖЖОКБҰ-лар іріктелген үміткерлерге ақпараттық және ұйымдастырушылық қолдау көрсетеді, шетел ЖЖОКБҰ-ларынан ресми шақыру алуға ықпал етеді, шетелге оқуға жіберу туралы бұйрық шығарады, оларды жіберуді жүзеге асырады, шетелде тұру және оқу үлгеріміне мониторинг жасайды, алынған оқу кредиттеріне талдау жүргізеді және оларды студенттің оқу жоспарында тіркейді, сондай-ақ оқу бағдарламаларына сәйкестігі үшін жауап береді.

«АКАДЕМИЯЛЫҚ ҰТҚЫРЛЫҚ ШЕҢБЕРІНДЕ ШЕТЕЛДЕ ОҚУ КОНКУРСЫНА ҚАТЫСУ ҮШІН ҚҰЖАТТАР ҚАБЫЛДАУ» МЕМЛЕКЕТТІК ҚЫЗМЕТІН КӨРСЕТУ ТӘРТІБІ

«Академиялық ұтқырлық шеңберінде шетелде оқу конкурсына қатысу үшін құжаттар қабылдау» мемлекеттік көрсетілетін қызметін (бұдан әрі – академиялық ұтқырлық шеңберінде мемлекеттік көрсетілетін қызмет) ЖЖОКБҰ-лар (бұдан әрі – көрсетілетін қызметті беруші) көрсетеді.

Академиялық ұтқырлық шеңберінде мемлекеттік көрсетілетін қызмет Жеке тұлғаларға (бұдан әрі – көрсетілетін қызметті алушы) тегін көрсетіледі.

Көрсетілетін қызметті алушы академиялық ұтқырлық шеңберінде шетелде оқу конкурсына қатысу үшін көрсетілетін қызметті берушіге көрсетілетін қызметті берушінің кеңсесі немесе портал арқылы осы Қағидаларға 10-қосымшаға сәйкес академиялық ұтқырлық шеңберінде мемлекеттік қызметте көзделген құжаттарды қоса бере отырып, білім алушының өтініш береді.

Құжаттарды көрсетілетін қызметті берушінің кеңсесі арқылы қабылдаған кезде көрсетілетін қызметті алушыға тиісті құжаттардың қабылданғаны туралы қолхат беріледі.

Көрсетілетін қызметті алушы құжаттар топтамасын және (немесе) қолданылу мерзімі өткен құжаттарды толық ұсынбаған жағдайда, көрсетілетін қызметті берушінің кеңсе қызметкері өтінішті қабылдаудан бас тартады.

Портал арқылы жүгінген жағдайда көрсетілетін қызметті алушының «жеке кабинетіне» академиялық ұтқырлық шеңберінде мемлекеттік көрсетілетін қызметке сұрау салудың қабылданғаны туралы мәртебе, сондай-ақ академиялық ұтқырлық шеңберінде мемлекеттік көрсетілетін қызмет нәтижесін алу күні мен уақыты көрсетілген хабарлама жіберіледі.

Көрсетілетін қызметті беруші мемлекеттік қызметті алу үшін көрсетілетін қызметті алушы ұсынған құжаттар және (немесе) оларда қамтылған деректер (мәліметтер) дәйексіз болған жағдайда мемлекеттік қызметті көрсетуден бас тартады.

Көрсетілетін қызметті алушы құжаттар топтамасын және (немесе) қолданылу мерзімі өткен құжаттарды толық ұсынбаған жағдайда, көрсетілетін қызметті беруші көрсетілетін қызметті алушыға өтінішті портал арқылы қабылдаудан бас тартады.

Құжаттарды қабылдаудың жалпы немесе академиялық ұтқырлық шеңберінде мемлекеттік қызмет көрсетуден бас тарту мерзімі 1 (бір) жұмыс күнін құрайды.

Көрсетілетін қызметті беруші «Мемлекеттік көрсетілетін қызметтер туралы» Қазақстан Республикасы Заңының 5-бабы 2-тармағының 11) тармақшасына сәйкес ақпараттандыру саласындағы уәкілетті орган белгілеген тәртіппен мемлекеттік қызметтер көрсету мониторингінің ақпараттық жүйесіне академиялық ұтқырлық шеңберінде мемлекеттік қызмет көрсетуді есепке алуды жүзеге асырады.

• Академиялық ұтқырлық шеңберінде мемлекеттік қызмет көрсету 1 (бір) жұмыс күні ішінде жүзеге асырылады және келесі рәсімдерден тұрады:
• – академиялық ұтқырлық шеңберінде мемлекеттік қызметте көрсетілген құжаттар тізбесіне сәйкес көрсетілетін қызметті алушы ұсынған құжаттарды қабылдау және толықтығын тексеру – 15 минут;
• – көрсетілетін қызметті алушы ұсынған құжаттардың конкурсқа қатысу шарттары мен талаптарына сәйкестігін тексеру – 30 минут;
• – көрсетілетін қызметті алушы ұсынған құжаттар және (немесе) деректер (мәліметтер) дәйексіз болса, конкурсқа қатысуға құжаттарды қабылдау туралы қолхат беру не академиялық ұтқырлық шеңберінде мемлекеттік қызметті көрсетуден жазбаша бас тарту – көрсетілетін қызметті берушіге құжаттар топтамасын тапсырған сәттен бастап 7 (жеті) жұмыс сағаты 15 (он бес) минут.

• Дереккөз: Шетелге, оның ішінде академиялық ұтқырлық шеңберінде оқытуға жіберу қағидаларын бекіту туралы Қазақстан Республикасы Білім және ғылым министрінің 2008 жылғы 19 қарашадағы N 613 Бұйрығы. Қазақстан Республикасының Әділет министрлігінде 2009 жылғы 22 қаңтарда Нормативтік құқықтық кесімдерді мемлекеттік тіркеудің тізіліміне N 5499 болып енгізілді.
• Ескерту. Бұйрықтың атауы жаңа редакцияда - ҚР Білім және ғылым министрінің м.а. 08.01.2016 № 15 (алғашқы ресми жарияланған күнінен кейін күнтізбелік он күн өткен соң қолданысқа енгізіледі) бұйрығымен.