Елбасы шеттегі және елге көшіп келетін ағайынды қолдау үшін «Отандастар» қоры» мен «Дүниежүзі қазақтары қауымдастығымен» бірлесіп, отандастарға жан-жақты қолдау мен көмек берудің іс-шараларын анықтап берді. Осы шараларды бірлесіп атқару мақсатында «Отандастар қоры» КЕАҚ жанынан Қоғамдық Комиссия (әрі қарай - Комиссия) құрылды.

Шеттегі қандастарымызға байланысты мемлекеттік саясаттың негізгі бағыттары:

- шеттегі қандастарымызды жан-жақты қолдау;

- Қазақстанға көшіп келген ағайындардың бейімделуіне көмек беру;

- мемлекеттік диаспоралық саясатты бағдарламалық және заңнамалық құжаттармен қамтамасыз ету.

Осы ретте, Комиссияның негізгі міндеті – мемлекеттік диаспоралық саясатты қалыптастыруда және отандастарға қолдау көрсетуде атқарылатын шаралардың жүзеге асырылуына жан-жақты ықпал ету.  

Комиссия құрамында мемлекеттік және қоғам қайраткерлері - Қуандық Тұрганқұлов, Оралбай Әбдікәрімов, Айдос Сарым, Түркітану және Алтай ғылыми-зерттеу орталығының директоры - Сартқожа Қаржаубай, ҚР Парламент Мәжілісінің депутаты Бейбіт Мамыраев,  Қазақстан заңгерлері одағының төрағасы Серік Ақылбай, «Егемен Қазақстан» республикалық газеті АҚ басқарма төрағасы Дархан Қыдырәлі, сондай ақ ғалымдар, саясаттанушылар, сарапшылар.

Комиссия мүшелері бір ауыздан, мемлекеттік қайраткер, тарих ғылымдарының кандидаты, саяси ғылымдарының докторы, профессор, Қазақстан Республикасы Парламенті Сенатының депутаты Мұрат Бақтиярұлын комиссия төрағасы етіп сайлады.

Диалог алаңының жұмысы барысында Қоғамдық Комиссияның 3 отырысы ұйымдастарылып, келесі мәселелер қаралды:

• Елге оралған қандастардың мәселелерін реттейтін қазақстандық заңнама жүйесі және шетелдегі қазақтарды мемлекеттік қолдау туралы заң жобасының барысы;
• ҚР ІІМ Көші - қон қызметі тарапынан репатрианттарға қызмет көрсетуді оңтайландыру және автоматтандандыру шаралары туралы;
• Отандастар қоры» КЕАҚ-ның шетелдегі қазақтарды қолдау бағытындағы атқарылған жұмыстар;

- ҚР Сыртқы істер министрлігінің қазақ диаспора мәселелері бойынша атқарып жатқан жұмыстары туралы.

Қоғам тарапынан шетелде тұратын қазақтардың мәселелерін зерттеу бойынша жиынтық-талдамалық зерттеулер мен отандастарды Отанына қайтарудың мемлекеттік қолдаудың халықаралық тәжірибесін зерделеу жобалары жүргізілді. Нәтижесінде «Шетелдегі қазақтарды және ерікті қоныс аударуды қолдаудың шаралар кешеніне ұсынымдар» және «Шетелдегі отандастарды мемлекеттік қолдау туралы» заң жобасы әзірленді.

Заң жобасын қабылдаудың мақсаты шетелдегі отандастарды мемлекеттік қолдауға байланысты қоғамдық қатынастарды реттеудің қажетті құқықтық негізін құру болып табылады.

«Отандастар қоры» КЕАҚ жанындағы Қоғамдық Комиссиясы V отырысының хаттамасынан үзінді

«Отандастар қоры» КЕАҚ жанындағы Қоғамдық Комиссиясы VІ отырысының хаттамасынан үзінді

Елбасының шетелдегі қазақтарды жан жақты қолдауға қатысты берген тапсырмаларды орындау мақсатында «Отандастар қоры» коммерциялық емес акционерлік қоғамының жанынан Ғылыми-сараптамалық кеңес (әрі қарай - Кеңес) құрылды.

Кеңестің мақсаты диаспоралық саясат мәселелерін шешу бойынша ғылыми негізделген ұсынымдар әзірлеу.

Кеңес құрамы елімізге белгілі мемлекет және қоғам қайраткерлері, Мәжіліс депутаты, танымал ғалымдардан тұрады.

Кеңестің негізгі міндеті - диаспоралық саясат мәселелері және шетелдегі отандастар мен тарихи Отанына келген этникалық қазақтардың әлеуметтік-құқықтық жағдайын зерттеу бойынша Қоғамның қызметін ғылыми-сараптамалық және талдамалық сүйемелдеу.

Кеңес құрамында Конституциялық Кеңестің мүшесі, заң ғылымдарының докторы, профессор Унзила Шапақ, Л.Н. Гумилев атындағы Еуразия ұлттық университетінің әлеуметтік-мәдени даму мәселелері жөніндегі проректоры,  ҚР ҰҒА академигі, филология ғылымдарының докторы, профессор Дихан Қамзабекұлы, ҚР Президенті жанындағы мемлекеттік қызмет академиясының этносаралық және конфессияаралық қатынастар орталығының басшысы, əлеуметтану  ғылымдарының  докторы Айгүл Сәдуақасова, «Астана» Халықаралық университетінің жоғарғы құқық мектебінің деканы, заң ғылымдарының докторы, профессор Сәуле Амандықова, басқа да ғалымдар, сарапшылар мен қоғам қайраткерлері.