«Otandastar Qory» KEAQ mädeni-gumanitarlyq jobalar departamentı 28.11.2019 jyly Nūr-Sūltan qalasynda ötken halyqaralyq «Otandastar. Bolaşaqqa bağdar» döñgelek üstelı aisynda paneldık sessii ūiymdastyrdy.
Sessii barysynda «Qazaq üiı» QMIÜ şeñberınde «Abai» mädeni ortalyğy jobasynyñ tanystyrylymy öttı jäne «Qazaq üiınıñ» qamqorlyğymen şeteldegı «Abai» mädeni ortalyqtary jelısınıñ jūmys formaty talqylanyp, bırlesken jūmystyñ naqty ūsynystary äzırlendı. Sonymen qatar, şet elderden jiynğa arnaiy şaqyrylğan qandastarğa «Qasiettı qazaq elı» halyqaralyq öner festivalı, jastarğa arnalğan şyğarmaşylyq konkurs, qazaqstandyq ärtısterdıñ şeteldegı konsertterı, «Otandastar» kıtaphanasy, sondai-aq otandastarğa, onyñ qatarynda qandas jastarğa arnalğan bılım beru, kielı oryndar boiynşa saihattar, Nazarbaev ziitkerlık mektepterı jäne «Baldäuren» bazasyndağy jazğy lagerler boiynşa tolyqqandy aqparat berıldı. Şet elderde tūratyn tanymal qandastar turaly «Qazaq älemı» - «Mir kazahov» atty ärbırı 2 tomdyq kıtap jobasynyñ jäne «Mūzbalaq» tolyqmetrajdy animasiilyq filmı tanystyryldy.
Qordyñ Vise-Prezidentı Mağauii Sarbasov jinalğandarğa «Abai» mädeni ortalyğynyñ maqsat-mındetterı», QR Mädeniet jäne sport ministrlıgınıñ ökılı Amankeldı Qojabek «Qazaqstannyñ mädeni häm tıl saisaty jäne şet elderde qazaq tılı, mädenietı men önerın örıstetu», QR Ūlttyq akademiilyq kıtaphanasynyñ ğalym-hatşysy Töregeldı Tūiqbai «Qazaq ädebietınıñ älemdık jelısın qūru», Ortalyq Qazaqstandyq saihat, qonaqüi, meiramhana jäne qolöner ısterı assosiasiisynyñ Prezidentı Maii Aqädılova «Qazaq ūlttyq qolönerın jetıldıru jäne elımızdıñ turistık tartymdylyğyn arttyru mäselesı boiynşa otandastarmen yntymaqtastyqty damytudağy ükımettık emes sektordyñ rolı» jaily aityp berdı. Al rejisser Tūrdybek Maidan «Mūzbalaq» tolyqmetrajdy animasiilyq filmın tanystyrdy.
Şet eldık qandastardan «Altai ölkesınıñ qazaqtary» qoğamdyq ūiymynyñ jetekşısı Arqalyq Soltanov «Abai» mädeni ortalyğy aisynda qazaq diasporasynyñ mädeni qajettılıgın öteu mümkındıgı jäne şetelde ūlttyq mädeniettı jetıldıru», Belgiidağy qazaq qoğamynyñ jetekşısı Aqmaral Ämırqūlova «Abai» mädeni ortalyğy aisynda qazaq tılın meñgeru jäne saqtap qalu mümkındıgı qandai?», Mäskeulık «Tomiris» produserlık ortalyğynyñ direktory Damili Tasmağambetova «Qazaq älemı» - «Mir kazahov» 2 tomdyq kıtap jobasynyñ tūsaukeserı - Şet elderdegı tanymal qazaqtar-jasampaz jastar turaly oilaryn ortağa saldy.
Jiynğa qatysqan Fransii-Parij qazaq mädeni ortalyğynñ jetekşısı Mahmūt Savaş, Keln qalasyndağy qazaq mädeni ortalyğynyñ ökılı Sadii Surer, Huston qazaq mektebınıñ jetekşısı Quatbek Maqūm, Mäskeudegı qazaq qoğamynyñ ökılı Gülzifa Jūmanqyzy, Türkiidağy Qoja Ahmet İassaui qorynyñ Prezidentı Iliis Saka, Moñğoliidağy «El bırlıgı» qoğamdyq bırlestıgınıñ törağasy Ğylymhan Ermekeiūly, german-qazaqstandyq qoğamynyñ atqaruşy direktory Galina Nūrtazinova ūsynys, tılekterın aita otyryp «Abai» mädeni ortalyğynan zor ümıt kütetınderın jetkızdı.