Tanys bolyñyz: Serıkhan Ahmetov

31 S'ilde, 2020

«Otandastar qorynyñ» janynda Qandastarğa qoldau körsetu ortalyğy jūmys ısteitını köpşılıkke mälım. Bügınde Qazaqstannyñ 10 oblysynda osy ortalyqtyñ ökılderı bar.

Osyğan deiın qandastarğa sapaly qyzmet körsetıp, mäselelerın naqty şeşu üşın jūmys ıstep jürgen käsıbi mamandarymyzben tanystyru maqsatynda jaña aidar arnağan edık. Sonymen tanys bolyñyzdar – Almaty oblysy boiynşa Qandastardy aqparattyq qoldau ortalyğynyñ sarapşysy Ahmetov Serıkhan Qalibekūly.

Serıkhan Ahmetov 1960 jyly 15 mamyrda Şyğys Qazaqstan oblysy, Tarbağatai audanynda tuyp, ösken. Almatydağy qazırgı Abylai han atyndağy Älem tılderı jäne halyqaralyq qatynastar universitetınıñ ağylşyn tılı fakultetın bıtırgen.

Otbasylyq jağdaiy - äielı Namazbaeva Galina joğarğy oqu ornynda ağylşyn tılınen sabaq beredı. Balalary - joğary bılımdı mamandar, är salada qyzmet atqarady.

Student kezden öleñderı respublikalyq basylymdarda jariilanyp tūrdy. 1985 jyldan 2016 jylğa deiın telejurnalistika salasynda, «Qazaqstan» telearnasynda qyzmet atqardy. «Qūs joly», «Tört qūbyla», «Eldestırmek elşıden» atty avtorlyq bağdarlamalary altyn qorda saqtauly. Eñ alğaş teledidarda «Qadır tünın» ūiymdastyryp jürgızdı. Bokstan älemge äigılı Stivensonnan tıkelei efirde alğaş bolyp ağylşyn tılınde sūhbat aldy.

Qazaqstan jurnalister odağy syilyqtarynyñ iegerı, QR-nyñ mädeniet qairatkerı. Är jyldary «Qazaqstan» telearnasynyñ bas redaktory, «Jetısu» telearnasynyñ bas direktory qyzmetterın atqardy. 2017 jyldan berı «Düniejüzı qazaqtary qauymdastyğy» men «Otandastar qorynyñ» Almaty oblystyq bölımınde qandastar mäselesın şeşu, ūiymdastyru jūmystaryn atqaryp keledı.

Qandastar mäselesımen ainalysu - jauapkerşılıgı mol, tabandylyq pen bılıktılıktı qajet etedı. Ahmetov Serıkhannyñ aituynşa, onyñ basty maqsaty - jüielerı basqa, ärtürlı elden kelgen qandastardyñ ortağa ornyğyp, sıñısıp ketuıne yqpaldasyp, solarğa qamqorlyq körsetıp, qol ūşyn beru.