Ertai Äbdıbekov: Armanymdağy Emporio Armani brendın tanystyrğanyma quanyştymyn

27 May'sym, 2023

Juyrda sän älemınıñ astanasy – Milanda ötken sän aptalyğynda düniejüzın moiyndatqan ırı brendter köz süisındırer erekşe toptamalaryn körermenge paş ettı. Älem asyğa kütetın olardyñ kolleksiilaryn podiumğa alyp şyqqan modelderdıñ qatarynda bızdıñ otandastarymyz da bar.

Milan törınde Ertai Äbdıbekov Emporio Armani, Rahat Köşkınbaev Balenciaga, al Nūrsūltan Oñdas JW Anderson brendınıñ kiımın köpşılıkke tanystyrdy. Būl ıske Rahat pen Nūrsūltannan erte aralasqan Ertai model boludy tıptı de armandamağanyn, bıraq uaqyt öte kele süiıktı ısıne ainalğanyn aitady. Milannan Parijge oralğan Ertaiğa habarlasyp, äñgımelesken edık.

– Ertai, model boludy būrynnan maqsat tūttyñ ba? Älde bärı kezdeisoq boldy ma?

– Joq, model boludy armandağan emespın. Tanymal boludy da maqsat tūtpadym. Men Almaty qalasynda tudym, bıraq toğyz jasymda otbasymmen bırge Almatynyñ şetınde ornalasqan Qaskeleñ qalasyna köşıp keldık. Bastapqyda gimnaziida, sosyn orta mektepte bılım aldym. «Kım boludy armandadyñ?» degıñız kelse, basynda aspaz bolğym keletın. Öitkenı men tamaq äzırlegendı ūnatamyn. Odan keiın ūşqyş boludy armandadym. Bıraq kölıkke mınsem basym ainalatyn bolğandyqtan, būl armanymnan bas tartuğa tura keldı. Qaskeleñde orta mekteptı bıtırgen soñ, tañdauym didjital marketolog mamandyğyna tüsıp, Suleiman Demirel atyndağy universitettıñ ekonomika fakultetıne oquğa tüstım. Qazır sonda 3-kursta oqimyn.

– Al sän industriisyna qalai keldıñ?

– Mektep bıtırgen kezde sol uaqytta köñıl jarastyryp jürgen qyzym Almatydağy Bacca models agenttıgınıñ kastingıne qatysyp, bağymdy synap köru turaly ūsynys aitty.

«Qatysa salaiyn, bärıbır menı eşkım almaidy» dep nemqūraily qarap, bara saldym. Keiın agenttık jetekşılerı ol kastingke jüzge juyq adam qatysqanyn, bıraq olardyñ arasynan menı ğana tañdap alğanyn aitty. Basynda «şok» boldym. Ata-anam da qatty tañğaldy. Bıraq bırte-bırte model boluğa laiyq ekenımdı tüsınıp, atalğan industriiğa bas sūğa bastadym.

Men şetelge şyğudy, kelısımşarttar jasasudy juyrda ğana bastadym. Būl – men qatysyp tūrğan ekınşı mausym. Men sän älemındegı alğaşqy qadamym Parij qalasynan bastaldy. Tura bır jyl būryn onda ötken sän aptalyğynda Alyx Studio men Amiri brendterınıñ körsetılımıne model retınde qatysqanmyn. Bastyqtarymnyñ aituynşa, sol kezde Europada bırınşı ret şou jasağan qazaq er adam men ekenmın.

Bızdıñ qyzdar ondai ülken podiumğa jiı şyğyp jür ğoi. Al erlerden men bırınşı bastadym. Parijdegı podiumğa şyğuym Qazaqstan modellingı üşın ülken jañalyq boldy. Oğan qatysqan bırınşı qazaq bolğandyqtan, sol körsetılım kezınde Qazaqstanda model ısımen ainalysatyndar menı baqylap otyrdy desem artyq aitpaimyn.

Negızı, menı ol körsetılımderge köp uaqyt boiy daiyndady. Sol üşın uaqyt öte kele öz-özıme senımım molai tüstı. 

Osy rette aita ketetın jait, Anna Lesovai jetekşılık etetın bızdıñ agenttık bügınde Qazaqstandy, sonyñ ışınde qazaq modelderın tanytuğa baryn salyp jatyr.

– İä. Anna sūhbatqa kelısu kezınde elde biznestı nölden bastağanyn, model bola alatyn kelbettı qazaqtar bar ekenın älemge tanytqysy keletının aitqan edı.

– İä. Rasynda Milanğa Qazaqstan qūramasy bolyp ūşyp keldık qoi (külıp). Ol aptalyqqa qazaqtardan menen bölek, Rahat Köşkınbaev pen Nūrsūltan Oñdas qatysty. Rahatty eldegı köpşılık bıluge tiıs. Öitkenı ol turaly bıraz aqparat agenttıkterı jarysa jazdy.

Milanda ötken aptalyqta men Emporio Armani-dıñ ekı kiım ülgısın tanystyrdym. Rahat Balenciaga brendınıñ kiımın, al Nūrsūltan debut jasap, älemge äigılı JW Anderson brendınıñ kiımderın körsettı. Bız üşeuımız de Bacca models agenttıgınde jūmys ısteimız. Men agenttıkke bırınşı bolyp jūmysqa tūrdym. Rahat qatarymyzğa byltyr qysta, al Nūrsūltan jaqynda qosyldy.

Rasynda da älemdık deñgeidegı poduimğa şyğatyn otandastar qatary bırte-bırte köbeiıp jatyr.

– Ata-anañ bolaşağyñdy model ısımen bailanystyramyn degen şeşımıñdı qalai qabyldady?

– Bastapqyda quandy. Sodan soñ kelısımşart jasasu kezınde būl tañdauyma bıraz küdıkpen qarady. Eldegı köpşılıktıñ sän industriisynan onşa habary joq ekenın bılesız ğoi. Sondyqtan olar baiybyna jetıp tüsınıp, aq-qarasyn ajyratyp alu üşın bırneşe zañger jaldap, kelısımşartty egjei-tegjeilı teksertkızdı. Keiın bärı taza, agenttık ökılderıne senım artuğa bolatynyna köz jetkızgen soñ, raiynan qaityp, menıñ şeşımımdı qūptady.

– Keibıreuler kezdeisoq kastingke qatyssa da, būl ıstı ärmen qarai ılıp äkete almai jatady. Al endı bıreuı kışkene künınen türlı agenttıktıñ kastingıne qatysyp, sanaly türde daiyndalady. Būl ıs sağan bırden ūnady ma? Älde jüre kele ūnattyñ ba?

– Mağan äpkem «Sen model bola alasyñ. Agenttıkke baryp körseñşı» dep ünemı aitatyn. Ekeuımız bala kezde America’s Next Top Model bağdarlamasyn jiı tamaşalaitynbyz. Ol kezde kışkentaimyn ğoi. Tek ädemılıkke qyzyğatynmyn. Öse kele de sän älemıne asqan bır qyzyğuşylyq bolmady. Bıraq bır jyl būryn sän älemıne bır kırgen soñ, būl industriinyñ san qyrly, syrğa toly ekenın tüsındım. Qazır būl ıs özıme qatty ūnaidy.

Ötken aptada Milanda ötken körsetılımnen keiın ekı ezuımdı älı jii almai jürmın. Men turaly jiı jaza bastağan soñ, ata-anam, dos-tuystarym maqtan tūtatynyn aityp, ystyq lebızderın jetkızıp jatyr. Töbeñdı kökke jetkızetın mūndai süiıktı ısıñmen ainalysqanğa ne jetsın!

Mysaly, bügın älemge sport kiımderımen tanymal Asics brendınıñ sporttyq aiqkiımın jarnamalaityn tüsırılımge qatysyp, jūmys prosesınen erekşe läzzat alyp qaittym.

Jalpy, körsetılımge şyğu, suretke tüsu bır basqa. Al kadr syrtyndağy jūmystan alar äserım tıpten bölek. Qalai aitsam bolady eken? Qarañyz, ūnağany sonşa, tıptı sözben sipattai almaimyn. Tüsırılım kezınde fotograf, meikaper, stilist, dizainermen dostyq qarym-qatynas ornatyp, jaily atmosfera ornağan älemge enıp ketesıñ.

Men model bolğanğa deiın sändı kiıne de almaitynmyn. Modelderdıñ köbı solai ğoi. Bıreuın köşeden, bıreuın avtobustan körıp qalyp, jūmysqa şaqyrady. Endı bırı men sekıldı kastingten ötedı. Mağan sändı kiınudı menen aqylyn aimaityn agentım Aleks pen latviilyq dosym üirettı. Emporio Armani körsetılımı kezınde.

– Sän aptalyğy saiyn küllı älemdı tañğaldyryp jürgen Emporio Armani-dıñ kiım ülgısın körsetuge qalai şaqyryldyñ?

– Älbette, basynda tañ-tamaşa boldym. Deñgeiı basqa. Atmosferasy özgeşe. Aldymen olardyñ kastingıne qatystym. Älgı kastingke myñnan astam model qatysty. Kasting barysynda brendtıñ negızın qalauşy, dizainer jäne kasting direktor senıñ jüru stilıñe erekşe män beredı. Ärı kiınu stilıñe de basa nazar audarady.

Men Emporio Armani-dıñ kastingıne türlı stildı bırıktırıp, kiınıp bardym. Bıle bılseñız, är brendtı özındık jüru stilı arqyly tanystyru qajet. Mysaly, Balenciaga körsetılımderıne baisaldy türmen şyğuyñ kerek. Al Yves Saint Laurent sän üiınıñ ökılderı öte aryq modelderdı ırıktep alady.

Aitpaqşy, kasting barysynda tüsırgen videomdy äleumettık jelıge jüktep salğanymda, keibıreuler «Eger senı onda model retınde maqūldasa, küler edım» degendei pıkırler jazyp, mūny bolmaşy jaitqa teñedı. Keiın mağan habarlasyp fitting, iğni kiım ölşeu prosesı bastalğanyn aitty. Būl degenımız – menı model retınde jartylai bekıttı degen söz. Aqyrynda menı tübegeilı bekıtıp, jūmysqa şaqyrğan kezde älgı mağan «küler edım» degenderdıñ habarlamasyn oqyp otyryp men küldım.

Aitpaqşy, Emporio Armani brendınıñ negızın qalauşy Djordjo Armanimen az-maz söilesıp, suretke tüstım. Seksen segız jastağy dizainerdıñ öte qarapaiym, aşyq kısı ekenın baiqap, tañğaldym. Djordjio Armanimen bırge

– TikTok-tağy jeke paraqşañda Emporio Armani-den syilyq alğanyñdy jazğan edıñ.

– Ol jazbam ülken auditoriiğa taralatynyn bılgende, salmas edım deidı külımsırep. Olardyñ bergen syilyğy ūnady. Ol körsetılımde eluge juyq model podiumğa şyqty. Irı brendterdıñ körsetılım aiqtalğan soñ modelderge syilyq beretın dästürı bar. Osy joly mağan Emporio Armani ökılderı sport kiım jiyntyğyn syilady.

Būryn Emporio Armani-dıñ körsetılımın qarap otyryp, bır künı men de osylai podiumğa şyğamyn dep tıptı armandamağanmyn. Bıraq sätın salyp, ekınşı mausymda osyndai ırı brendtıñ kiım ülgısın tanystyruğa laiyq model dep tanylğanyma quanyştymyn.

– Būl sen jūmys ıstegen bırınşı ülken brend şyğar?

– Joq. Oñtüstık Koreiğa şaqyrylyp, Samsung-tıñ Galaxy S23 Ultra telefony tanystyrylğan jarnamağa tüstım. Ony Koreinyñ eñ ülken bilbordynan körsettı. YouTube-tan, jalpy barlyq äleumettık jelıden de taratyldy. Qazaqstanğa da taraluyn kütken edım, bıraq şyqpai qaldy. Osy jarnamadan soñ köpşılık menı tani bastady.

Bırde kafede otyrğan kezde egde jastağy erlı-zaiyptylar menı teledidardan körgenın aityp, bırge suretke tüsuımdı ötındı.

Sosyn Dolce & Gabbana sän üiı ökılderınıñ Tailandta ötkızgen jabyq körsetılımıne qatystym. Onda Dolce & Gabbana sän üiınıñ negızın qalauşy dizainerlerdıñ kezınde öz qoldarymen tıkken, qazır mūrajaida tūrğan ekskluziv kiımderın tanystyrdyq. Sol kezde ūiymdastyruşylar menı Tailandtyñ bır ärtısıne ūqsatyp, körsetılımge şaqyrğanyn aitqan edı.

– Senı ol jaqta basqa Azii halyqtarymen şatastyrmady ma?- dep sūrağaly otyrmyn. Bıraq sen, Rahat, Nūrsūltan üşeuıñ Parij, Milandağy sän aptalyqtaryna qatysa bastağaly berı köpşılık qazaq ekenderıñdı ajyratyp, ainymai tani bastağan sekıldı.

– İä, öitkenı būl industrii bızde endı damyp keledı. Qazaqstanda model agenttıgı jeterlık. Bıraq olar älemdık naryqqa şyğudyñ jolyn bılmeidı. Al mūny sättı ıske asyryp jatqan, «Qazaq modelder osyndai bolady» dep bızdı tanystyryp jürgen bızdıñ agenttık qana. Būl bır jağynan, älbette, quantarlyq jağdai. Bıraq ekınşı jağynan şynynda qynjyltatyn jağdailar da bar. Sebebı elde älemdık deñgeige şyğu kerek ekenın eşkım aita bermeidı, jarnama dūrys jasalmaidy. Jas modelder şeteldegı körsetılımderge qatysyp, Qazaqstandy tanytuğa barynşa tyrysyp jür.

Maqtamai-aq qoiiyn, bıraq bızdıñ direktor bastağan top köp modeldı tauyp, jattyqtyryp, üiretuge baryn salyp jatyr. Mūndai qarqynmen jūmys ıstei berudı jalğastyrsaq, juyrda Europa jūrty Qazaqstannan ekenımızdı aitqyzbai-aq tanityndai deñgeige jetemız dep oilaimyn.

Jaña sız Aziinyñ basqa halyqtarymen şatastyrudy söz ettıñız ğoi. Men bır jyl būryn qyryqqa juyq kastingke qatystym. Ainalamdağylardyñ «Qaidansyñ?» degen sūrağyna «Qazaqstannanmyn» dep jauap bersem, «Ol qaida?» dep tañdana sūraidy.

Oñtüstık Korei men Tailandta kelısımşartpen jūmys ıstegen kezde menıñ bırese kärıs, bırese tai dep oilap, jaqyn tartady. Kei jağdaida ata-anam ekı ūlt ökılı dep topşylasa kerek. Bıraq ünemı qaidan, qai ūlttan taraitynymdy aityp jürgen soñ, qazır kastingterge qatysqanda bärı qazaq ekenımdı, Qazaqstannan ekenımdı jaqsy bıledı.

Qazır sız atap ötkendei, älemdık deñgeidegı körsetılımderge jiı şyğatyn qazaqstandyq modelder sany arta bastağan soñ, köpşılık bızdıñ elde de model boluğa laiyq kelbettı jandar baryn bıledı. Qazaq modeldıñ bet-älpetı qandai bolatynyn ajyrata alady. Aziattar tobyna jatsaq ta, kärıster, japondardan aiyrmaşylyğymyz bar ekenın bıledı. Sondyqtan men özımdı podiumda tek brendtı emes, ūltty, eldı tanystyryp jürmın dep oilaimyn.

– Endıgı jospar qandai? «Myna brendtıñ kiım ülgısın tanystyrsam ğoi», «Myna kompaniinyñ jarnama roligıne tüssem ğoi» degen armanyñ bar ma?

– Aldağy uaqytta Prada sän üiınıñ körsetılımıne qatysqym keledı. Sosyn, älbette älemdık brendterdıñ bet-beinesı atanudy armandaimyn. Jalpy Parij ben Milanda ötetın körsetılımderde jaña mausymnyñ aşyluy, jaña kolleksiilardyñ tanystyrylymy bolady. Al basqa kezde modelder köbıne Nu-İorkte nemese Londonda ornalasqan türlı brendtermen jūmys ısteidı. Sol sekıldı men de sol ekı ırı qalada jūmys ıstep qaitudy közdep otyrmyn.

Qazır Amerikamen kelıssözder jürgızılıp jatyr. Al Londondağy agenttıkpen kelısımşart jasasqan. Parijden soñ Qytaiğa jol jürgelı otyrmyn. Sosyn Nu-İork nemese Londonğa jūmys ısteuge baramyn.

– Tüsırılım nemese körsetılımge qatysu kezınde köp jağdaida qabağyn tüiıp alatynyn bağamdap, «Osy modelder tabiğatynan tūiyq pa, qalai?» dep oilaisyñ. Al sen qandaisyñ? Model bolğaly berı mınezıñde özgerıs baiqaldy ma?

– Būl ıstı qolğa alğaly berı jaqsy jaqqa özgergenımdı baiqaimyn. Kökjiegım keñeiıp, ainalama mülde basqa közqaraspen qarai bastadym. Būryn söilesuge onşa joq edım. Al qazır köp adammen aralasamyn. Kün saiyn jaña dos tabamyn. Öz-özımdı damytyp, bılımımdı jetıldırıp jürmın. Ağylşynşam jaqsardy. Fransuz tılın de tüsıne bastadym. Koreida jūmys ıstegende kärıs, Tailandta jürgende tai tılın de bıraz üirenıp aldym.

Qalyptasqan tağy bır jaqsy ädet, eldıñ aitqanyn elemeitın boldym. Resei, Qazaqstanda tūratyn köpşılık eger er adam model bolyp jūmys ıstese, onyñ orientasiisy basqa degen oi tüiedı. Menıñ aitarym – būl tıptı de olai emes!

Jalpy, model bolğanym üşın kelemejdeitınder barşylyq. Bıraq men olardyñ aitqanyna qūlaq aspaimyn.

– Olai aitatyndarğa jauabyñ daiyn ğoi. Özıñ aitqandai, sen podiumda qazaq ūltyn, qazaqtyñ kelbetın tanystyryp jürsıñ.

– Rahmet! Endı piğyly jaman adamdarğa qalai jauap beru kerek ekenın bılemın! Osy rette süiıktı ısımen ainalysqysy kelıp jürgenderge äsırese, men sekıldı model bolğysy keletınderge aitarym  äldebıreulerdıñ sözın jürekke jaqyn qabyldamañdar.

Syn köp estıgenderdıñ bırı menmın. Bıraq menıñ sağym synğan joq. Eşkımnıñ sende şaruasy joq. Patşa köñılıñ qalağan ıstı qolğa al. Sen şyn qalasañ, bärıne de qol jetkızesıñ. Keide qalamasañ da, şyñğa şyğaryp jıberedı. Sondyqtan öz ısıñe adal boluğa tiıssıñ. Tübı nätijesın beretını anyq.

– Bos uaqytyñda nemen ainalysasyñ? Qandai hobbiıñ bar?

– Taza auada qydyrğandy ūnatamyn. Sosyn anime qarağan ūnaidy. Komputer oiyndaryn oinaimyn. Bos uaqytta ata-anama kömektesuge tyrysamyn.

Anam Qaskeleñde konditerlık ıspen ainalysady. Türlı bälış, keks pen toqaş pısıredı. Joğaryda aityp ötkendei, men tağam äzırlegendı ūnatamyn. Sondyqtan anamnyñ kömekşısımın desem bolady.

– Äñgımeñe rahmet! Oilağanyñ ıske assyn!

Sūhbattasqan Älii TILEUJANQYZY

Foto: Ertai Äbdıbekovtıñ jeke mūrağatynan