Jetısu oblysy Aqsu audanyna qarasty Qapal auylynda tūratyn Vladimir Chepel – qoğam belsendısı, tıl janaşyry. Tuğan jerınıñ, sonyñ ışınde tuğan auylynyñ keleşegıne bei-jai qaramaityn azamat. Jürgen jerınde memlekettık tıldı bıludıñ mañyzyn aityp, jastarğa ündeu joldaudan şarşamaityn ol Qapal auyldyq okrugı äkımınıñ apparatynda jūmys ısteidı. Ūlty orys bolğanymen, jüregı qazaq dep soğatyn 31 jastağy Vladimir Turkystan.kz tılşısıne bergen sūhbatynda qazaq tılınıñ märtesebı men qoğamdağy orny turaly söz qozğady.
«1993 jyly Qapal dep atalatyn ädemı auylda düniege keldım. Osyndağy Ğali Ormanov atyndağy orta mektepte oqydym. 2011 jyly «Taldyqorğan Zañ kolledjıne» tüsıp, ony 2013 jyly tämamdadym. Sodan soñ Ö.Joldasbekov atyndağy ekonomika jäne qūqyq akademiisynda bılımımdı jalğastyrdym. Orys tılınde bılım alsam da, qazaq tılın jetık bılemın. Sebebı men – auyldyñ şañyn jūtyp, topyrağyna aunap ösken balamyn», – deidı Vladimir Chepel.
«Memlekettık tıl – menıñ tılım» degen ūrandy berık ūstanatyn Vladimir auyldastarynyñ arasynda «qazaqtyñ sary balasy» degen atpen tanymal.

«Qai jasymnan bastap qazaq tılınde söilegenımdı eske tüsıru qiyn. Qazaq tılı mağan ana sütımen daryğan desem de artyq aitqanym emes. Bır qyzyq aitaiyn, men orys tılınde jauap berer aldynda mätındı oişa qazaq tılınde qūrastyramyn. Sebebı menıñ miym qazaqşa oilaidy. Aldymen aitar oiymdy memlekettık tılde jüielep alyp, orys tılıne audaramyn. Qazaqtıldı ūjymda qyzmet atqaramyn. Ärıptesterımnıñ arasynda Vladimir bolsam, auyldastarym «Väke» deidı. Jūmys babymen auyl ışın jiı aralap tūramyn. Sonda aqsaqaldar men aq jaulyqty analarymyz «sary bala» kele jatyr dep aldymnan şyğyp, jyly şyrai tanytady. Ūltym orys bolğanmen, özımdı qazaqpyn dep esepteimın. Aityp ötkenımdei, orys tılıne qarağanda, qazaq tılın jaqsy bılemın. Auylda öskendıkten dostarymnyñ barlyğy qazaq balalary boldy. Qazırgı ortam da qazaqtıldı. Sondyqtan özımdı qazaqpyn dep aitamyn», – deidı V. Chepel.
Qazaq tılın erkın meñgergen Vladimir qazır Qapal auylyndağy äkımdıkte qyzmet etedı.
«2011 syrttai kolledjge oquğa tüstım. Sol jyly Altyn Dala AGRO Zhetysu JŞS-de qarapaiym jūmysşy bolyp jūmysqa tūrdym. Keiın kompaniida ofis-menedjer, zañger bolyp qyzmet atqardym. Bala kezımnen ata-anam bılımge, eñbekke degen qūştarlyqty oita bıldı. 2014 jyly kompanii jabylyp, aqyrynda men jūmyssyz qaldym. Sodan Qapal auyldyq okrugı äkımınıñ apparatynda jetekşı mamannyñ orny bos ekenın bıldım. Būl jañalyqty esti sala, bıraz daiyndalyp, memlekettık test tapsyrdym. 2015 jyly synnan sürınbei ötıp, jetekşı maman retınde jūmysqa qabyldandym. 2020 jyly ışkı konkurstyñ nätijesı boiynşa Qapal auyldyq okrugı äkımı apparatynyñ bas mamany bolyp tağaiyndaldym. Qazır Qapal auyldyq okrugı äkımınıñ apparatynda jūmys ısteimın», – deidı bas maman.
Vladimir öz arasynda qazaqşa söilei almaityn azamattardyñ da bar ekenıne qynjylatynyn aitady. Onyñ oiynşa, qazaq tılınıñ örısın keñeitu üşın tılge qajettılık boluğa tiıs.

«Özım – tıl janaşyrymyn. Memlekettık tıldı öte qatty qūrmetteimın, syilaimyn. Ainalamdağy adamdardy, iğni, ärıptesterımdı, dostarymdy, zamandastarymdy ärqaşanda qazaq tılın üirenuge şaqyryp jüremın. Tıldı meñgerude olarğa qolymnan kelgenşe kömek körsetemın. Negızı, bızdıñ halyq tolyqtai memlekettık tıldı tüsınedı dep aituğa bolady. 90 paiyzy tap-taza söilei alady. 6 paiyzy keibır sözderdı, ärıpterdı dūrys aita almasa da, oiyn jetkıze alady. Al qalğan 4 paiyzy tüsıngenımen, söilegenge qysylady. Jalpy tıl jağynan elımızde eşqandai qysym joq. Sebebı bızdıñ Ata Zañymyzda är adamnyñ qandai da bır özge tıldı meñgeruıne şekteu qoiylmağan. Bıraq bız Qazaqstan Respublikasynda tūratyndyqtan, onyñ tılın, dının, topyrağyn, suyn – bärın qūrmetteuımız kerek. Al endı tūryp jatqan jerımızdıñ tılın bılmesek, basqa düniesın qalai tüsınbekpız?! Bärı tılden bastalady. Halqymyz «Tıl – dostyqtyñ kıltı» dep beker aitpağan. Iğni, elımızdıñ ärbır azamaty memlekettık tıldı bıluı kerek. Sol kezde ğana qazaqtyñ tarihyn, bolmysyn tolyq tüsıne alady», – deidı V. Chepel.
Vladimir söz arasynda qazaq tılı köpşılık oilağandai üirenuge qiyn tıl emes ekenın atap öttı.
«Qazaq tılınde söileu – qiyn emes. Nietke bailanysty. Talaptanğan är adam söilep kete alady dep oilaimyn. Memlekettık tıldı endı meñgerıp jürgenderge aitarym, eñ bastysy – tyrysu kerek. Köbırek kıtap jäne maqala oqyğan abzal. Ärı el arasynda qazaqşa söileuge ūilmau kerek. Odan bölek, radio, teledidar habarlaryn tyñdaudyñ paidasy da zor. Iğni, üirenuşı aitylymnan, aksentten ūilmau kerek», – deidı ol.
Söz soñynda Vladimir Chepel barşa qazaqstandyqty bırlıkke, yntymaqqa şaqyryp, el tūrğyndaryn Qazaqstan halqynyñ bırlıgı künımen qūttyqtady.
«Barşañyzdy aituly merekemen şyn jürekten qūttyqtai otyryp, zor densaulyq, otbasylaryñyzğa qūt-bereke, baqyt tıleimın! «Dını basqa, tılı basqa, tılegı bır», bır şañyraq astynda jinalğan ūlt pen ūlys ökılderınıñ elımızdıñ yntymağy-yrysy men bailyğy-berekesın arttyryp, tatulyğy jarasqan bızdıñ elde ömır sürıp jatqany jürekke senım, köñılge quanyş ūilatady.
Köp ūlttyñ tatulyğy, yntymaqtastyğy, beibıtşılıgı – bızdıñ elımızdıñ eñ basty bailyğy. Ony közdıñ qaraşyğyndai saqtauğa tyrysaiyq. Bereke-bırlıgımız arta bersın!», – deidı Vladimir ağynan jarylyp.