Orynbordağy 120 myñ qazaqty ūiystyrğan Jañabai

31 Mamyr, 2024

Jañabai Balabaev – Orynbordağy aimaqtyq qazaq ūlttyq-mädeni avtonomiisynyñ basşysy ärı «Bäiterek» qaiyrymdylyq qorynyñ negızın qa­lauşy. Reseide qazaq köp şoğyrlanğan ölkede köp igı ıs atqaryp jürgen Jañabai Aitqaliūlyn tanityndar ony köpke ülgı etıp, maqtanyp aityp jüredı. Äsırese, sonda tuyp-ösken sportşylar ol kısıden köp jaq­sylyq körgenın jarysa aitady. Orynbordan bölek, Qazaqstannyñ bırneşe qalasynda käsıbın döñgeletıp jürgen käsıpker-mesenatqa habarlasyp, äñgımesın jazyp alğan edık.

QAZAQSTANDAĞY KÄSIPKERLERMEN JŪMYS ISTEGEN TİIMDIREK

Men 1977 jyly 5 qyrküiekte Orynbor oblysy Aleksandr audany Engels auylynda düniege keldım. Atam – audannyñ eñbek sıñırgen şopany bolğan, Lenin Ordenın alğan qazaq. Anam saqmanşy, al äkem vettehnik bolyp jūmys ıstedı. Auyl mektebınen keiın, agrarlyq universitettı qyzylğa bıtırdım. Men tuğan auylda 44 üi ğana boldy. Onyñ altauynda qazaqtar, al qalğanynda orystar, ukraindyqtar, chuvaştar jäne t.b ūlt ökılderı tūrdy. Bala kezden üidegılerdıñ soğym soiyp, jūma künı jetı şelpek pısırıp, Qūran oqyğanyn körıp östım. Qolymyzdy jaiyp, dūğa oqitynbyz. Alaida men sol kezde mūny jete tüsıne bermeitınmın. «Ne üşın qol jaimyz?», «Kımnen ne sūraimyz?» dep tañdanatynmyn. Keiın Orynborğa kelıp, universitet bıtırgen soñ jaldamaly üide tūrdym. Sol ekı arada şañyraq köterdım. Alaida bırazğa deiın jūmys taba almai, älekke tüstım. Taksi jürgızdım, küzetşı bolyp jūmys ıstedım. Sol uaqytta äielım qyzymdy jetı ailyğynda düniege äkeldı. Auruhanağa barğanymda därıgerler säbidıñ tynys aluy qiyn, ökpesı jetılmedı deidı. «Aitqanyñyzdy äkep beremın. Ne ısteu kerek?» degenımde, därıger «Dūrysy, dūğa oqyñyz!» dedı. Al men dūğa oqi almaimyn. Ol kezde jasym 24-te. Üige kelıp, kereuetke otyra ketıp, ağyl-tegıl jyladym. Sodan soñ bärı oñailap, qyzym sauyğyp kettı. Jūmys ta tabyldy. Astyq şyğarumen ainalysatyn tatar käsıpkerdıñ firmasyna jūmysqa tūrdym. Ol – bes uaqyt namazyn qaza qylmaityn, qajylyqqa baryp kelgen añqyldaq azamat. Köptegen meşıtke qaita jöndeu jūmystaryn jürgızetın. Onyñ qasynda jürıp, köp närsenı üirendım, tüidım. Bırde jūmystan şyqqan soñ, «Ua Alla, mağan mümkındık berseñ, men direktorymnan artyq sauap­ty ıs ısteimın» dep jalbaryndym.

Onda bes jyl jūmys ıstegen soñ, jeke käsıpkerlıkke bet būrdym. Basynda bır elevator satyp aldym. Sosyn astyq saqtaityn qoima satyp aldym, sodan soñ ekınşısın, artynan üşınşısın satyp aldym. Keiın astyq tasityn vagon­dar satyp aldym.  Qazır Orynborda ärıptesımmen süt önımderın öndıretın zauyt salyp jatyrmyz. Sosyn önım sapasyn anyqtaityn özı­mızdıñ zerthanamyz bar. Jalğa ğimarat be­remız. Avtoparkımız bar. Şağyn kafege ie­lık etemın. As mäzırınde özge ūlttyñ, sonyñ ışınde özımızdıñ ūlttyq tağamdar da bar. Odan bö­lek, meşıtterdı qaita qalpyna keltıru ısı­men ainalysamyn. Bızde «Oñ qolyñ bergendı, sol qolyñ bılmesın» dep aitady ğoi. Būl ıspen maqtanuğa äste bolmaidy. Tek ainalamda jürgen, men sekıldı mümkındıgı bar azamattarğa ülgı bolsyn degen maqsatpen aityp jatyrmyn. Byltyr Donguz auylynda tūratyn qazaqtar meşıttıñ qūrylysyn aiqtauğa kömek sūrady. Kömektesıp qana qoimai, qasyna 250 adam siityn ashana salyp berdık. Sodan soñ Qūiğan audanynda meşıt saluğa atsalystym. Qazır qazaq köp şoğyrlanğan Isnenskii audanynda da meşıt salyp jatyrmyz. Odan bölek, Qazaqstandağy serıktesterımmen de ortaq käsıbım bar. Serıktesımmen bırge Qostanaida ösımdık maiyn äzırleitın zauyttyñ jūmysyna belsene aralasamyn. Oğan qosa, ışı ūlttyq naqyşta ärlengen üş meiramhanağa da qatysym bar. Sondai ashananyñ bırın tu­rister köp baratyn Groznyi qalasynda aşsaq degen jospar tağy bar. Sebebı şe­şen­der bızdı ärı bızdıñ tağamdarymyzdy qatty qūrmetteitının bılesız. Ekı el arasyndağy şekara älemdegı eñ ūzyn bolğandyqtan, mağan Qazaqstandağy käsıpkerlermen jūmys ıstegen tiımdırek.

Joldasymnyñ esımı – Oksana. Qazaq. Mamandyğy – tıl mamany. Ekeuımız 4 ūl, 1 qyz tärbielep otyrmyz. 25 jastağy ülkenım Astanada jūmys ısteidı. 23 jastağy qyzym Mäskeude Joğary ekonomika mektebınde oqidy. Ortanşy ūlym 13 jasta. Asta­nada halyqaralyq mektepte bılım alyp jatyr. Odan keiıngı ūlym Orynborda mektepte oqidy. Al ekı jasar kenje ūlym üide.

Käsıpkerlıkke bet būrğan kezden bastap, qaiyrymdylyqpen ainalysa bastadym. Alai­da jeke tūlğa retınde ainalysu qiynğa soqty. Uaqytym tapşy boldy. Sosyn jūbaiym dūrysy qor aşaiyq dedı. Osylaişa «Bäiterek» degen atpen qaiyrymdylyq qoryn aştyq. Aqşa köp tapqan saiyn, kömekke zäru adamdar sany da köbeie tüstı. Äsırese, qazaq tılı men tarihyn üirengısı keletın azamattar qatary artty. Aldymen osy ekı ıstı qolğa aldyq. Keiın qatarymyzğa käsıbi mamandar öz erkımen qosyldy. Mysaly, osynda tūrmysqa şyqqan qyzylordalyq Äigerım dombyra üirete alatynyn aityp, seksii aşty. Basynda men olarğa eşteñe tölemedım. Sodan soñ «Aqylaryñdy töleimın, bıraq köp adam jinañdar» dep aittym. Osylaişa, bızdıñ jūmys jandana tüstı.

BIZ –  120 MYÑBYZ

Bızde Qazaqstandağydai Halyqtar Assambleisy sekıldı Ūlt ısterı jönındegı federaldy agenttıgı belsendı jūmys ısteidı. Ol agenttık är ūlttyñ özındık mädeni avtonomiisyn bırıktıredı. Baidäuletov Azamat ağamyz bastağan top Orynbordağy aimaqtyq qazaq ūlttyq-mädeni avtonomiisyna jauapty bolğan, alaida olar anau aitqandai belsendı jūmys ıstei almady. Bırde ol kısı mağan kelıp «Senıñ şamañ jetedı. Mümkındıgıñ bar. Av­tonomiiny sen basqar» dep ūsynys bıldırdı. Osylaişa, tört jyl būryn avtonomiinyñ basşysy qyzmetıne tağaiyndaldym. Sodan berı kölemdı ıs-şara, Nauryz, Körısu meiramyn dürkıretıp atap ötıp jürmız. Bız, Resei qazaqtarynyñ Resei halyqtary qūrylymynda laiyq oryn alğanyn körsetu üşın tynbai jūmys ıstep jatyrmyz. Orynborda jalpy sany 36 audan bolsa, onyñ 16-synda qazaqtar tūrady. Tıptı, keibır auyl tūrğyndarynyñ elu paiyzy – qazaqtar. Resei boiynşa köp qazaq şoğyrlanğan aimaq – Astrahan oblysy. Onda 180 myñ qazaq tūra­dy. Ekınşı orynda Orynbor oblysy tūr. Bız –  120 myñbyz. Aitpasam da bıletın şyğarsyz, Orynbor – är qazaq üşın orny bölek oryn. Men mūnyñ mañyzyn mädeni avtonomiiny basqarğan soñ jete tüsındım. Bız Qazaqstannan kelgen qazaqtarğa ekskursii jasap, qala ışın aralatamyz. Qazaq KSR-nıñ alğaşqy astanasy atağy bar. Odan bölek, mūnda Ybyrai Altynsarin oqyğan mektep bar. Mağan deiın belsendı jūmys ıstegen qazaqtar ol mektepke estelık taqtaişa qoiğan. Mūnda Qazaq KSR-nıñ bırınşı ükımetı otyrğan ğimarat, Ahmet Baitūrsyn-ūly tūrğan üi bar. Bızde Baitūrsyn­ūly, Almatinskai, Aktubinskai, Karagandinskai dep atalatyn köşe bar. Ärı Keñes Odağynyñ Batyry atağyn ekı ret ielengen Talğat Bigeldinov oqyğan äskeri uchilişe de osynda. Köp qairatkerdıñ ömırı osy Orynbormen bailanysty ekenın tarihtan bıletın bolarsyz. 5 jyl būryn «Orenburskii put Ahmeta Baitursynuly» atty kıtaptyñ jaryqqa şyğuyna demeuşılık körsetıp, tūsau­keserın jasadyq. Sosyn käsıpker Serık Säken­ūly onyñ qazaqşağa audaryluyna qarjylai kömek körsettı.

Aita keterlıgı, bız ülken sportta jetıstıkke jetıp jürgen etnikalyq qazaqtardy qanatymyzdyñ astyna alyp, kömektesıp jürmız. Qazır Qazaqstan atynan synğa tüsıp, jasyndai jarqyrap jürgen dzudoşy Nūrlan İsataidy äkesı «Qūdai qalasa, menıñ ūlym Olimpiada chempiony bolady» dep 9 jasynda alyp kelgen edı. Sol kezden berı onyñ kiımı, jattyğu jiyny, jarysqa baruyna deiın kömektesıp, balanyñ betın qaqpauğa tyrystyq. Reseide halyqaralyq jarystarğa şekteu qoiylğan soñ, onyñ gruzin bapkerı Gruziiğa barudy ūsynypty. Bız onyñ tarihi Otany – Qazaqstanğa baruyn qaladyq. Qūdaiğa şükır, ol balanyñ aiy oñynan tuyp, azamattyq alyp, bırden Azii kubogın, bır aidan soñ Europa kubogınde altyn jülde enşıledı. Sodan soñ kadetter arasynda älem chempiony atandy. Būl tek bız üşın emes, Qazaqstan üşın de ülken jetıstık bolğanyna bärımız kuä boldyq. Nūrlan sekıldı bızdıñ ölkeden şyqqan myqtylar jeterlık. UFC ligasynda beldesken tūñğyş etnikalyq qazaq Damir İsmağūlov ta – bızdıñ auyldyñ balasy. Odan keiın Qazaqstannan Jalğas, Şavkattar sol ligada baq synauğa köştı. Salamat İsbullaev degen myqtymyz aqtöbelık sport klubta jattyğyp jür. Janar Qūsanova esımdı qyzymyz – sambodan Resei chempiony, älem chempionatynyñ kümıs jüldegerı. Al Dias Izbasarov paralimpiadaşymyz türlı sportpen ainalysady. Reseidıñ 30 dürkın chempiony. Osylar sekıldı daryndy ba­lalarğa kömektesıp, qoldau körsetuge tyrysamyz. Aitpaqşy, «Kazahi Orenburji» dep şyğatyn jurnalymyzğa jetıstıkterımız ben ıs-şaralarymyz turaly jariilap tūramyz. Sportşylardan bölek, tūrmysy naşar adamdarğa jyl saiyn azyq-tülık taratamyz. Ūltqa bölmeimız, köbıne auyl tūrğyndaryna kömektesemız. Juyrda bes balasy bar, jalğyz­basty, qazaq äieldıñ üiı örtenıp ketken bolatyn. Osyndağy jylumen qamtamasyz etu, tereze jasau, jaryq tartu ısımen ainalysatyn qazaq käsıpkerlerdı jinap alyp «Barlyq materialdy satyp äperemın. Kömektesıp jıberıñızder» dep aittym. Söitıp, jaqynda ol äieldıñ üiıne jöndeu jūmystaryn jürgızıp berdık. Aramyzda «Jyl mūğalımı» atanğan mamandardy da qoldaudan kende emes. Etnikalyq qazaq ekenın baiqasaq, bailanysyp, ne kerek ekenın sūrap, qoldau körsetemız. Osylaişa, bız Qazaqstan azamattaryna Reseidegı qazaqtar da sızder sekıldı, iğni Resei men Qazaqstan qazaqtary bır halyq ekenın körsetkımız keledı.

Rasynda – bız bırmız. Tıptı, Qazaqstannan osynda kelgen qazaqtar «Sızder bızge qarağanda dästürdı berık ūstanady ekensızder» dep tañğalysyn jasyrmaidy. Degenmen bızde tıl mäselesı aqsañdap tūrğanyn aita ketken jön. Būryn Orynborğa oquğa kelgen qazaqtar öz auyldaryna baryp, qazaqi ortağa gümp ete tüsetın. Qazır auyldağylardyñ köbı qalağa köşken. Būrynğydai orta joq. Asa köp eşkımmen söilese almaidy. Men de balalarymnyñ tıl bılmei ösıp jatqanyna qyn­jylatynmyn. Sondyqtan ülkenım men ortanşymdy mentalitettı, tıldı bılsın dep Qazaqstanğa jıberdım.  Qūdaiğa şükır, ülkenım otbasyly bolğysy keletının aityp, ötkende qūdalarymmen tanysyp qaittyq. Būiyrsa, Oraldan kelın alğaly jatyrmyz. Tamyz aiynyñ soñynda ülken toi bolğaly jatyr. «Kelınım Qazaqstannan bolsa eken! Nemerelerım Qazaqstanda tūrsa!» dep armandaityn edım. Sol tıleuım qabyl bolyp, äuletımızge inabatty, ibaly kelın būiyrdy.

Avtonomii ötkızetın ıs-şaralarğa qajet aq­şany köbıne men beremın. Ara-tūra basqa käsıpkerler de jūmyla kırısedı. Biznes älemındegı bedelımdı paidalanyp, «Avtobus kerek», «Kiız üi qajet» dep habarlasamyn. Olar kez kelgen bastamamdy qoldai jöneledı. Juyrda Nauryz merekesın toilaimyz dep, Orynbordyñ ortalyq köşesıne ūlttyq kiımmen şyqtyq. Tağamnan däm tatqyzdyq. Bi biledık. Mūnyñ äserın eş suret te, eş video da bere almaidy. Sol alañda toilatyp jürgenımızde özge ūlttardyñ qyzyğa qarağany öz aldyna, özımızdıñ etnikalyq qazaqtardyñ bızge qarağanda, boilaryn maqtanyş kernegenın añğardyq. Būlai köşenı aralau mağan qatty ūnap qaldy. Negızı, men ol ıs-şarağa tek jūmys retınde qarağan edım, alaida qaitqan kezde töbem kökke bır elı jetpei, erekşe küige bölendım.

ÄKE, MŪNDA BÄRI QAZAQŞA SÖİLEİDI

Joldasym Oksana «Orynbordyñ kelınderı» atty jobany jürgızedı. Tūrmystağy qaryndastarymyz ekı aptada bır ret jinalyp tūrady. Odan bölek, egde jastağylardyñ basyn bırıktıretın «Orynbordyñ äjelerı» atty jobamyz jäne bar. Kelınder men äjeler köbıne bırge jinalady. Ülkenderımız kelınderge dästür, yrymdar turaly bar bılgenın aitady. Sälemdı qalai salu kerek, asty qalai beru kerek sekıldı bıluge tiıs närselerdı üiretedı. Orynbor tügılı, Qazaqstannyñ ışınde dästürdı ärkım ärtürlı ūstanady. Mysaly, Batys pen Oñtüstıktıkı bır-bırıne ūqsamaidy. Al bız özımızge jaqyn ornalasqan Batys Qazaqstannyñ dästürın üirenemız. Erlerdı de soğan baulyğymyz keledı. Byltyr men tört aida tört jerleu räsımıne qatystym. Är jerde ärtürlı ötkızedı eken. «Būlai bolmas, ortaq ereje äzırleu kerek» dep Qazaqstandağy dostarymnan aqyl-keñes sūrap, bärın tızıp aldym.

Avtonomiida balalar lagerı jūmys ısteidı. Üş auysymda oqityn otyzğa juyq balağa qazaqşa taqpaq üiretıp, ağa degen kım, nağaşy degen qai jūrt degen sekıldı qarapaiym tüsınıkterdı üiretemız. Odan bölek, olarğa qazaq halqynyñ tarihyn da baindaimyz. Eresekterdı de ūmyt qylmaimyz. Batany qalai dūrys beru kerek ekenın üirengısı keletınderdıñ qarasy köp. Pedagogikalyq bılımı bar qyzdarymyz olardy jeke şaqyryp, bärın üiretedı. Sonymen qatar bızde 80-ge juyq adam dombyra kursyna qatysady. Qor janynan qūrylğan «Bäiterek» dombyraşylar ansamblı köp konsert pen ıs-şaralarğa qatysady. Ötkende sol ansambl müşelerı Aqtöbeden kelgen qonaqtardy kütıp aldy. Keiın keñseden şyğyp bara jatqanymyzda dombyraşy qyzdarymyzdyñ futliryn köterıp, trolleibusqa mınıp bara jatqanyn körsetıp qonaqtaryma «Qarañdarşy. Qazaqstanda köşede mūndai körınıs körmeisızder. Al Orynborda osylai» dep maqtandym. Rasymen bızde Orynborda balalaika tartatyn ansambl joq, al dombyraşylar ansamblı bar. Odan bölek, bızde ūlttyq bidı nasihattaityn «Tūmar» ansamblı bar.

Joğaryda aityp ötkenımdei, jastar arman quyp qalağa keledı. Köbısı bızdıñ qatarymyzğa qosylady. Rasynda, qalanyñ özınde köp qazaqty köresıñ. Köşede kele jatsañ, SQO, Qostanaida kele jatqandai sezınesıñ. Ärı bızde erkın küres seksiisy bar. Sondai-aq qolöner būiymdaryn jasau, suret saludy üiretetın üiırmeler jäne bar.

«Otandastar qory», «Düniejüzılık qazaqtar qauymdastyğy» kömek körsetıp tūrady. «Otandastar qory» bızge alty dombyra, sosyn türlı şapandar berıp jıberdı. Ekı teledidar syilady. Älbette, olar bız qalağandai köp bere almaidy. Alaida, olar bızdı ūmytpaidy. Jyl saiyn «Baldäuren» lagerıne otyzğa juyq balağa bilet berıledı. Balalar quana-quana barady. Men qaibır jyly ortanşy balamdy jıbergenmın. Bastapqyda «Äke, mūnda bärı qazaqşa söileidı. Men olardy tüsınbeimın» dep jylağany bar. Sosyn ekı aptadan soñ qaitar kezde «Menıñ qaitqym kelmeidı deidı. Osynda qalamyn. Moñğolii, Qyrğyz Respublikasy, Özbekstan, Europadan kelgen qazaq balalarmen dostasyp aldym» dep köñılımdı bır marqaityp tastady.

Qazır bız menıñ būrynğy keñsemde jūmys ısteimız. Armanym – Orynbor qazaqtaryn bırıktıretın ülken ortalyq jasaqtau. Bızde osynda ūlttyq auyl bar. Kezınde är ūlt özınıñ şağyn üiın sonda saldyrtqan. Qazır jalpy sany on ekı üişık tūr. Kezınde qazaqtardyñ da jeke üişıgı bolğan. Esık aldynda üş kiız üi tūr, muzeiı men meiramhanasy tağy bar. Ol üişıktı jeke tūlğa aşqandyqtan, ol bankrot bolyp, aqyrynda banktıñ ielıgıne ötıp ketken. Qazır men sol bankpen söilesıp, üidı qaitaryp alu mäselesın qarastyryp jatyrmyn. Qūdai qalasa, onyñ ışın jöndep, qor men avtonomiinyñ jūmysyn bır arnağa to­ğys­tyratyn, jalpy är qazaqtyñ bas qosa­tyn orny qylğym keledı.

ÄUE BAİLANYSY AŞYLSA EKEN

Bızde qazır ekı-aq mäsele bar. Eñ aldy­men, Astana nemese Almatymen äue bailanysy aşylsa eken deimız. Jetı jyl būryn aptasyna ekı ret Astanağa qatynaityn reis bolğan edı. Al qazır tek avtokölıkpen Aqtöbege nemese Qostanaiğa ğana bara alamyz. Qatynau qiyndağannan soñ, qazır bas qalağa baratyndar qatary siredı. Elşılıkke hat jazyp, būl mäselenıñ şeşıp beruın ötınıp jatyrmyz. Sebebı bız Aqtöbe nemese Qostanaiğa ğana emes, basqa qalalardy da aralağymyz keledı. Balalarymyzdy top-topqa bölıp, ırı qalalardy aralatudy maqsat etıp jürmız. Ekınşı mäselege kelsek, kezınde «Otandastar qorynyñ» būrynğy basşysy Abzal Saparbek­ūly Orynborğa 50 adam öner körsetetın almatylyq ansambldı alyp keldı. Olar dombyra men qobyzda oinap, köpşılıktıñ qoşemetıne bölendı. Sol kezde ekranda är aspapqa qa­tysty sipattama jazylğan bolatyn. Ondağy qobyzdy ömırı körmegen qazaqtardy aitpağanda, orystar «Bız qazaqtyñ ūlttyq as­paby dombyra ma dep jürsek. Qobyz degen de bar eken ğoi» dep añ-tañ boldy. Qanşa de­gen­men, ülken ansambldıñ jönı bölek. Kiımderı de tıpten bölek. Oryndauy da ğajap. Mädeniettı nasihattauy tıpten basqaşa. Orynborda osyndai konsertter jiı ūiymdastyrylsa deimız.

Sebebı «Būl önerdı bız ğana emes, Qazaqstandağy bauyrlarymyz da osylai körsete alady» dep maqtanyp, jar salğymyz keledı. Bızge Tūrsynbek Qabatov, Abai Begei, Ashat Tarğyn, Nūrbolat Abdullinder kelıp, konsert qoiğan bolatyn. Juyrda Qairat Nūrtas kelıp kettı. Bız köbıne ärtısterdı qaiyrymdylyq konsertterge şaqyramyz. Keiıngı kezde bızde kommersiilyq konsert ūiymdastyratyndar, toi basqaratyn agenttıkter qatary köbeidı. Olar aqşa tabudy közdese de, özderı bılmesten, bızge mädeniettı nasihattap jür. Olar bız estımegen ändı tyñdatyp, būryn-soñdy körmegen änşını alyp kelıp, tanystyryp jatyr. Mysaly, Tūrsynbektıñ keşınde Nūrbolat Abdullin öner körsettı. Bız onyñ kım ekenın de bılmeimız. Tekserıp qarasaq, ol Qazaqstandağy hit än aitatyn, tanymal änşılerdıñ bırı eken.

Söz soñynda aitarym, joğaryda atap ötkenımdei, köp ısımdı maqtanyşpen aityp bergenım joq. Qasymda qaltasy qalyñ, alaida közdegenı basqa jıgıtterge ülgı bolsyn dei­mın. Sebebı rasynda menıñ ne ıstep jürgenımdı körıp-bılgen köpşılık sony qaitalauğa tyrysady. Mysaly, Qazaqstannan kelgender menımen jaqyn tanysqan soñ «Jäke, sız Orynborda jürıp, bızdıñ mädeniettı nasihattap jürsız. Qaiyrymdylyq qoryñyz bar. Al bız Qazaqstanda jürıp, olai ıstemeimız» dep tömen qarap aitady. Keiın Qazaqstanğa barğan soñ, bıraz ıske bastamaşy bolğanyn baiqap jatamyn. Sosyn men elge barğanda olar nätijelerın aityp, maqtanady. Osylaişa, olarmen qaiyrymdylyq jasap, bır-bırımızben jarysamyz.

Maqtanbaimyn, bıraq men – auqatty adammyn. Mağan eşteñe kerek emes. Alla nesıbemdı arttyryp, köp ıske bastamaşy boluğa mümkındık berıp otyr. Sondai mümkındık barda mädenietımızdı ary qarai damytqym keledı. Men bır öñırge gubernator, DUMA deputaty, bır käsıporynğa bastyq ta bolğym kelmeidı. Osy qarapaiym käsıpker qalpymda qalyp, ainalama jaqsylyq jasap jüre bersem bolğany. Mağan käsıpkerlıkpen ainalysuğa, köp joba jasauğa mümkındık berıp otyrğan Resei ükımetıne rizamyn. Resei halqy bızdı qatty qūrmetteidı, bızdıñ de olarğa qūrmetımız şeksız. Orynbor ölkesınıñ tumasy bolğandyqtan, osynda tūratyn qazaq­tardyñ qolaily ömır süruıne jağdai jasauğa qolymnan kelgenşe tyrysamyn. Qūdai qalasa, menı Orynbordağy Qazaqstannyñ Qūrmettı konsuly etıp tağaiyndau mäselesı qarastyrylyp jatyr. Bärı oñynan bolsa, jūmys būrynğydan beter jandana tüsedı dep senemın.

 

Jazyp alğan

Älii TILEUJANQYZY

turkystan.kz