Отырыс 2025 жылғы 2 желтоқсанда Будапештте өтті. Бұл жоғары деңгейдегі диаспоралық кездесу Венгрияда алғаш рет ұйымдастырылды. Қазақстан атынан іс-шараға «Отандастар қоры» КеАҚ Президенті Данияр Қадыров және Қазақстан Республикасының Мажарстандағы Елшісі Абзал Сапарбекұлы қатысып, мемлекетіміздің өкілдігін қамтамасыз етті. ТМҰ мүшелі елдер тарапынан Әзербайжан, Өзбекстан, Қырғызстан және Түркиядан өкілдер қатысты.

Отырысқа ТМҰ Бас хатшысы Елші Кубанычбек Омуралиев пен Мажарстанның шетелдегі Мажар қауымдастықтарына жауапты мемлекеттік хатшысы Лоринц Нача төрағалық етті.

Кездесу барысында әлемдегі түркі диаспораларының қазіргі жағдайына қатысты маңызды мәселелер талқыланды. Талқылаулар диаспора мекемелері арасындағы ынтымақтастықты нығайтуға, шетелдегі түркі қауымдастықтары арасындағы ынтымақтастықты тереңдетуге және ортақ бастамалар арқылы ТМҰ диаспорасының танымалдығын әрі өзара байланысын арттыруға бағытталды.

Отандастар қоры Президенті Данияр Қадыров өз сөзінде шетелдегі этникалық қауымдастықтарды қолдау – түркі әлемінің тұтастығын нығайтудың негізгі бағыттарының бірі екенін атап өтті.

Отырыс ортақ бағдарламаларды дамыту және ТМҰ-ға мүше елдердің диаспора мекемелері арасындағы ынтымақтастықты нығайту жөніндегі міндеттемелерді қайта растаумен қорытындыланды.