2025  жылдың 5-6 сәуірінде Корея Республикасы, Сеул қаласында Азия қазақтарының құрылтайы өтеді.

Іс-шара Сеулдегі «Qazaq Nomad Korea» ұйымының бастамасымен, Қазақстан Республикасының Корея Республикасындағы Елшілігі және«Отандастар қоры»  КеАҚ-ның қолдауымен ұйымдастырылып отыр. Сонымен қатар, демеушілер қатарында: Hankuk шет тілдері университеті (HUFS), «Air Astana» әуе компаниясы, «Pana» қонақүйлер желісі және «ELSYM8» компаниясы бар.

Іс-шараға Оңтүстік Корея, Малайзия, Жапония, Қытай және басқада Оңтүстік-Шығыс Азияелдерінде тұратын отандастардың қатысуы күтілуде.

Құрылтайда Азия елдеріндегі қазақ мәдени орталықтарының қазіргі жағдайы мен болашақ жоспарлары, мәдени-рухани байланыстарды нығайту, сондай-ақ шетелдегі отандастармен білім, ғылым және кәсіпкерлік салаларында серіктестік орнату секілді маңызды мәселелер талқыланатын болады.

Азия қазақтары құрылтайының бағдарламасы екі күнге жоспарланған.Іс-шараның алғашқы күні мәдениет саласы өкілдерінің қатысуымен мәдени блок және қазақстандық және корейкәсіпкерініңқатысуымен экономикалық блоктан тұратын екі пленарлы отырыс жоспарланған.

Мәдени блоктағы спикерлер құрамы:

• Cветлана Айтбаева – Қазақстанның еңбек сіңірген қайраткері, әнші;

• Айгерим Мусагажинова – Этнограф, ғалым, «Қазақтың бiрегей тағамдары» кiтабының авторы;

• Сон Ёң Хун (Son Young-Hoon) – Ханкук шет тiлдерi университетiнiң Орталық Азиятану кафедрасының профессоры;

• Абзал Арықбаев – Тұран этно фольклорлы ансамблінің қалаушылардың бірі, Аркайым тобының мүшесі, Qsandyq музыкалық қосымшасының Арт директоры;

• Жұбаныш Жексенұлы – сазгер, Қазақстанның еңбек сiңiрген қайраткерi.

Экономикалық блок спикерлері:

• Данияр Кельбетов – АХҚО (МФЦА) Қаржы өнімдері жөніндегі бас директор, Басқарма мүшесі;

• Маржан Қадырова – Малайзиядағы қазақ орталығы өкілі, Әлеуметтік медиадағы мазмұнды модерациялау бойынша топ жетекші;

• О Мария – «Best Medical Korea» негiзiн қалаушы,

дәрiгер, кәсiпкер;

•J unichiro Takahashi (Әбдібек Қалибекұлы) – Токиодағы қазақ орталығы төрағасы, жоғарғы санатты дәрігер, кәсіпкер;

• Ким Бо Хян – Экспорт саласының маманы, Dari Crew платформасының негiзiн қалаушы;

• Ким Юрий – «SoftBox» кәсіби дыбыстау және дубляж студиясы.

Ал екінші күні қазақ орталықтарының өкілдері мен отандастарымыздың қатысуымен Наурыз мерекесін атап өту, ұлттық ойындар фестивалі және өнер жұлдыздарының қатысуымен мерекелік концерт ұйымдастырылмақ.

Азияның әр түкпірінен келген делегаттардың Кореядағы басқосуы – шетелдегі қазақы құндылықтардың жаңғырып, жырақта жүрсе де, туған елмен байланысын үзбейтін отандастарымызбен арадағы ынтымақтастықты нығайтатын маңызды қадам екені сөзсіз.