«Qazaq radiosynda» jaña «Qandastar» habary aşyldy

09 Aqpan, 2021

Qara şañyraq «Qazaq radiosynda» ​ jaña «Qandastar» habary aşyldy. Habar aisynda eldegı jäne älemdegı qandastarğa arnalğan jobalar tanystyrylyp, köşı-qon, qūjattardy räsımdeu, kvota beruge qatysty tüitkıldı mäselelerdı şeşu joldary talqylanady. Sondai-aq atamekenge köşıp kelgen soñ, öz ısınıñ bılıktı mamany retınde el qūrmetıne bölengen qandastarmen, şeteldegı älemge äigılı kompaniilarda qyzmet atqaryp jürgen otandastarymyzben sūhbattar ūiymdastyrylady.

2021 jylğy 9 aqpanda «Qandastar» radiohabarynyñ alğaşqy sany efirge şyqty. Oğan elımızdegı jäne şeteldegı qandastarymyzdy qoldau bağytynda jūmys jürgızıp jatqan Düniejüzı qazaqtary qauymdastyğynyñ keñesşısı Qarlyğaş Qojamūrat pen «Otandastar qory» KeAQ vise-prezidentı Mağauii Sarbasov qatysty.

Soñğy kezderı ındetke bailanysty engızılgen karantinge orai Qytaidan kelgen qandastardyñ elge kıru mäselesınde bırqatar tüitkılder tuyndağan edı. Osyğan orai ekı mekemenıñ ūsynysymen vedomstvoaralyq ükımettık komissiiğa hat joldanyp, tüitkıl oñ şeşımın tapty. Ötken aptada jaña ereje engızılıp, vizasy bar, şaqyrtuy bar qandastardyñ elge kıruıne şekteu qoiylmaityn boldy. ​

Sonymen qatar, bağdarlama aisynda tağy bır süiınşı jañalyq aityldy. Atap aitqanda qazır qazaqtar köp şoğyrlanğan älemdegı 12 eldegı 24 ırı qalada qazaq tılın üiretetın 31 synyp ıske qosyldy. Olar şeteldegı qandastarymyzdyñ ötınışterıne orai balalarğa, jastarğa ana tılın onlain platformada arnaiy ädısteme boiynşa üiretıp jatyr.

Osyğan qosa jaña oqu jylynda Qazaqstandağy joğary oqu oryndaryna älemdegı elderden 909 jas qandasymyz oquğa tüsse, 825 jas daiyndyq kursyna, al 520 jas qandas kolledjderge qabyldanğan. Olardyñ barlyğy jazda ŪBT synağan tūñğyş ret onlain tapsyrğan edı.

2020 jyly Stambul, Berlin, Täşkent, Omby, Kiev qalalarynda qandastarymyzdy qoldauğa bağyttalğan «Abai» mädeni-ıskerlık üilerı aşyldy. Biyl Bain-Ölgei aimağynda, Bışkek pen Astrahan qalalarynda aşu josparlanyp otyr.

«Qandastar» habary är seisenbı saiyn «Qazaq radiosynan» sağat 11:15-te tıkelei efirge şyğatyn bolady. Aita keteiık, kez-kelgen tyñdarman 8-717-2-75-72-75 telefony arqyly sūraq qoi alady. Habardyñ jürgızuşısı – jurnalist Erkın Baiğabylūly. «Qazaq radiosyn» onlain tyñdau: https://qazradio.fm/kz/.