
«Bılım inemen qūdyq qazğandai», – deidı halqymyz. El ışınde bılım alğan oquşylar on bır jyldyq bılımın ūlttyq bırıñğai testıleu arqyly anyqtaidy. Synaqtan alğan nätijesıne qarai joğarğy oqu ornyna tüsu mümkındıgıne ie bolady. Täuelsızdık jyldarynan berı Elbasy bastamasymen el saisatynyñ basym bağyttarynyñ bırı retınde qandastarymyz atajūrtqa orala bastady. Osy jyldardan berı millionnan astam azamattyñ elge oralğany köñılge quanyş ūilatady. Prezident Qasym-Jomart Toqaev elge kelgısı keletın qandastarymyzğa jağdai jasalatynyn atap öttı.
Bılım salasynda qandas jastardy elge şaqyru mäselesı özektılıgın joğaltqan joq. Qandas jastardyñ Qazaqstanda oqu üşın şaqyrtu alu mäselesı Bılım jäne ğylym ministrlıgı tarapynan bır ızdı jolğa qoiyldy. Bastapqyda elge kelıp bılım alsa, keiınnen mamandyğyna qarai jūmys ıstep, otbasyn qūryp atajūrtta qaluyna jağdai jasaldy. Dese de özge elde sauatyn aşyp, mektep tabaldyryğyn attağan jastarğa elımızge kelıp bırden ŪBT tapsyru qiynğa tüsedı.
Sol üşın Bılım jäne ğylym ministrlıgı tarapynan talapkerlerdı ūlttyq bırıñğai testıleuge dairlaityn daiyndyq bölımı aşyldy. 2018-2019 jyldary 992, 2019-2020 jyldary 1300 qandasymyz daiyndyq bölımıne qabyldandy. 2020-2021 oqu jylyna respublikalyq budjet qarjylandyratyn bılım beru ūiymdarynyñ daiyndyq bölımderıne ūlty qazaq Qazaqstan Respublikasynyñ azamattary bolyp tabylmaityn azamattardy oqytuğa 1300 oryn bölındı.
Jyl saiyn qandastardy qabyldauğa arnalğan kvota 2%-dan, 4%-ğa östı. Atajūrtta bılım alğysy keletın talapker jastardyñ sany jyl saiyn artyp keledı. Biyl ŪBT tapsyruğa 2025 qandasymyzdan ötınış kelıp tüsken. Qandas talapker jastardyñ basym bölıgı ŪBT el ışınde tapsyrdy.
«Otandastar qory» älemdık pandemiiğa bailanysty elge kele almai ŪBT tapsyru mümkındıgınen şet qalğan qandastarymyzdyñ mäselesın köterdı. Jūmys barysy üş ai uaqytqa sozyldy.
Nätijesınde Bılım jäne ğylym, Syrtqy ıster ministrlıkterınıñ, Ūlttyq testıleu ortalyğynyñ qoldauymen, QR aumağynda koronovirustyq infeksiinyñ paida boluy men taraluyna jol bermeu jönındegı vedomstvoaralyq komissii otyrysynda şetelde qalğan talapker qandastarğa ŪBT «Onlain» ötkızu şeşımı qabyldandy. Būğan deiın elımızde ŪBT onlain rejimde ötkızılmegen. «Jūmyla kötergen jük jeñıl», – degendei bırıgıp atqarğan jemıstı qyzmet aisynda 733 qandasymyz 19 şılde onlain ŪBT qatysty. Qandas talapkerlerdıñ onlain test tapsyruyna atsalysqan barşa mamandardyñ qyzmetıne rizaşylyğymdy bıldıremın», – deidı «Otandastar qorynyñ» vise-prezidentı Mağauii Sarbasov.
Şettegı qandas talapkerlerımız «Otandastar qory» kötergen mäselenıñ oñ şeşım tabuyna yqpal etken Ūlttyq testıleu ortalyğy, Syrtqy ıster men Bılım jäne ğylym ministrlıgıne alğysyn jetkızdı.
«Bükıl älemdı jailağan covid 19 ındetıne bailanysty şekara jabylyp bız Qazaqstandağy ūlttyq bırıñğai testleuge qatysu mümkındıgınen şet qaldyq. Degenmen, «Otandastar qory» mäsele köterıp, ŪTO, Syrtqy ıster men Bılım jäne ğylym ministrlıgınıñ qoldauymen şetelde qalyp qoiğan qazaq balalaryna onlain ŪBT tapsyruğa rūqsat berıldı. Būl bızge jasalğan ülken jeñıldık boldy», – deidı Qazaq inovasiilyq gumanitarlyq-zañ universitetınıñ tyñdauşysy Bain-Ölgei aimağyndağy qandasymyz Erjan Amanjol.
Talapkerler 2020 jyly 19 şıldede ötkızılgen onlain testıleu barysynyñ beinejazbasyn Ūlttyq testıleu ortalyğyna jıbermese, test nätijesı şyqpaidy. Testıleu nätijesı tek beinejazba qaralğannan keiın ğana jaramdy bolyp tabylady. Beinejazba Ūlttyq testıleu ortalyğynyñ nct-kt@mail.ru poştasyna jıberılmegen jağdaida, testıleu nätijesı joiylatyn bolady.
Qazaq elındegı qandas jastardy ŪBT daiyndaityn oqu ordalary qiyn kezeñde şetelde jürgen qazaq jastaryn öz tarihi otanynda oqyp, bılım aluyna, bolaşağyn qazaq elımen bailanystyruyna zor mümkındık berdı. Talapker qandas jastar testten alğan bağasyna qarai el ışındegı oqu ordalarynyñ studentı atanady. Būl är talapkerdıñ testten alğan nätijesıne qarai jeke qaralady.