
Memleket basşysy Qasym-Jomart Kemelūlynyñ atyna Moñğolii jerındegı qandastarymyzdyñ alğysyn arqalağan haty kelıp tüstı.
Hatta qandastarymyz osynau qiyn qystau zamanda Qazaqstanğa bılım alu üşın kelgen qaraközderge qamqorlyq körsetıp, barlyq jağdai jasap otyrğan memleketımızge, osyndai jağdaidyñ jasaluyna pärmen berıp, baqylauda ūstap otyrğan Prezidentke rizaşylyqtaryn bıldırgen.
«Sızge qiyrdağy Moñğolii memleketınde meken etken qazaq qandastaryñyzdyñ atynan dūğai sälem! Qyzmetıñızge sättılık pen tabys tıleimız. Qazaqstannyñ abyroiy arta bersın! Älemdı jailağan myna ındet tezırek ketıp, aqjarylqap uaqyt bastalsyn dep, Jaratqannan sūraimyz», - dep bastalypty qandastarymyzdyñ haty.
Būdan ary Moñğoliidağy ındetpen küres şaralaryn aita kelıp:
«Osy şekaralar jabylyp, ūşaq ūşpai, kölık jürmei qalğan qiyn kezde bızdıñ bıraz oquşy balamyz Qazaqstan Respublikasynda qalyp qoidy. Bız būğan äu basta qatty alañdadyq. Tıptı, uaiymdap, äbırjıgen kezımız de boldy.
Alaida, būnymyz beker bolyp şyqty. Eñ bırınşıden, Prezident retınde Özıñızdıñ qamqorlyğyñyzdyñ arqasynda, ekınşıden, Bılım jäne ğylym ministrlıgı men L.N.Gumilev atyndağy Eurazii ūlttyq universitetınıñ kömegımen Qazaqstanğa bılım ızdep barğan dairlyq bölımındegı ūl-qyzdarymyzdyñ tamağy toq, köilegı kök. Olar da el azamattarymen bırdei karantin talaptaryn saqtap, aqparattyq tehnologii jüiesımen sabaqtaryn oqyp jür. Mūny telefon arqyly künde bılıp otyrmyz. Köñılımız ornyna tüstı. «Şükır!» dep otyrmyz.
Ardaqty Qasym-Jomart Kemelūly! Bızdıñ oqudağy balalarymyz erteñ student, sodan keiın maman atanyp, Qazaqstan-Monğolii yntymaqtastyğyn odan ärı arttyrady dep senemız.
Rizaşylyq nietpen, L.N.Gumilev atyndağy Eurazii ūlttyq universitetınıñ dairlyq bölımınde oqyp jatqan Moñğol Ūlysy oquşylarynyñ ata-analary», - dep, hattyñ astyna 13 ata-ana qol qoiypty.