2026 jylğy 19 qaraşada Kanadanyñ Toronto qalasyndağy The Parkdale Hall zalynda Respublika künı men Qazaqstan Täuelsızdıgınıñ 35 jyldyğyna arnalğan merekelık konsert öttı. Keştı «Otandastar qory» KeAQ, Qazaqstan Respublikasynyñ Kanadadağy Elşılıgı jäne Toronto men Ülken Toronto öñırındegı qazaqstandyqtar qauymdastyğy bırlesıp ūiymdastyrdy.
Keş etnomädeni järmeñkeden bastaldy. Qonaqtar qazaq halqynyñ salt-dästürımen, qolönerımen jäne ūlttyq mūrasymen tanysty. Körermender arasynda Kanadanyñ är öñırınen kelgen otandastar, jergılıktı qoğam, ıskerlık jäne şyğarmaşylyq orta ökılderı boldy. Qūrmettı qonaqtardyñ qatarynda Ontario provinsiisynyñ multikulturalizm jönındegı būrynğy ministrı ärı Zañ şyğaruşy jinalysynyñ būrynğy deputaty Toni Rupreht boldy.
«Otandastar qory» KeAQ vise-prezidentı A. Jūrqadam jinalğandardy Respublika künımen jäne aldağy Täuelsızdıktıñ 35 jyldyğymen qūttyqtady.
«Şeteldegı otandastardyñ Qazaqstanmen bailanysyn nyğaitu – bızdıñ basty mındetımız. Bügıngı öner keşı elge degen sağynyştaryñyzğa sazdy sälem bolady dep senemın», – dedı A. Jūrqadam.
Qazaqstannyñ eñbek sıñırgen qairatkerı Qaraqat Äbıldina men änşı ärı produser Qydyrälı Bolmanov «Aiulym», «Rizamyn sağan» jäne «Bağym sen» änderın oryndady. «Ūlytau» toby Qūrmanğazynyñ «Adai», Nūrğisa Tılendievtıñ «Ata tolğauy» küilerı men Antonio Vivaldidıñ «Qys» şyğarmasyn etno-rok mänerınde ūsyndy. Dombyranyñ zamanaui öñdeudegı ünı men qazaqtyñ köne ışektı aspaby jetıgen kanadalyq körermenderdıñ erekşe qyzyğuşylyğyn tudyrdy.
Keş qazaqstandyq dizainerlerdıñ ūlttyq kiım toptamalarynyñ körsetılımımen aiqtaldy. «Qydyrälı – Qaraqat» mektep-studiisynyñ şäkırtterı Gauhar Ömırzaqtyñ toptamasy körsetılgende «Men qazaq qyzdaryna qairan qalam» änınıñ äuenın jetıgende oryndady. Al «Ūlytau» toby Däuletkereidıñ «Köroğly» küiın oryndağan sätte «Bay Brand» brendınıñ negızın qalauşy Banu Gaidardyñ toptamasy tanystyryldy.
Toronto men Ülken Toronto öñırındegı qazaqstandyqtar qauymdastyğynyñ jetekşısı Madina Keñesbaeva soñğy jyldary Qazaqstannan Kanadağa kelgen otandastar sany edäuır artqanyn atap öttı. Onyñ aituynşa, körermender önerpazdarğa qoşemet körsetıp, ūiymdastyruşylarğa rizaşylyq bıldırdı. Qauymdastyq jetekşısı osyndai mädeni keşter jiı ötse, Kanadadağy otandastardyñ Qazaqstanmen bailanysy nyğai tüsetının aitty.