Qazaqstan Respublikasy Syrtqy ıster ministrlıgınıñ resmi ökılı J. Üsenovtıñ brifingı
Körıp otyrğanymyzdai, soñğy uaqytta Qazaqstan Respublikasynyñ azamattary şetelde jürgende bolu elınıñ zañnamasyn bılmeu, sondai-aq şet memleketterdıñ köşı-qon, vizalyq, tranzittık jäne kedendık talaptaryn saqtamau nemese olardan habarsyz bolu saldarynan türlı qiyn jağdailarğa tap bolatyn oqiğalardyñ sany artyp keledı.
Būl rette eñ aldymen, elde bolu merzımderın būzu, tyiym salynğan nemese deklarasiilanbağan tauarlardy alyp ötuge äreket jasau, sondai-aq şet memleketterdıñ aumağynda tranzitpen ötu jäne bolu qağidalaryn saqtamau jağdailary turaly söz bolyp otyr.
Osyğan bailanysty otandastarymyzdy şetelge şyğu aldynda baratyn eldıñ, sondai-aq tranzit arqyly ötetın memleketterdıñ zañnamasyn, vizalyq jäne köşı-qon talaptaryn mūqiit zerdeleuge şaqyramyz. Pasporttardyñ, vizalardyñ, elde boluğa berılgen rūqsattardyñ jäne basqa da qajettı qūjattardyñ jaramdylyq merzımderıne erekşe nazar audarğan jön.
Sonymen qatar medisinalyq saqtandyrudy resımdeudı, äue biletterın tek resmi servister arqyly satyp aludy, äue kompaniilarynyñ bagaj ben tranzitke qatysty talaptaryn saqtaudy, qūjattaryñyzdy üşınşı tūlğalarğa bermeudı, sondai-aq ışındegı zattardyñ mazmūnyna tolyq köz jetkızbegen jağdaida bögde adamdardyñ sömkelerın, sälemdemelerın jäne basqa da zattaryn alyp jüruden bas tartudy ūsynamyz.
Şetelge jūmys ısteu, bılım alu nemese emdelu maqsatynda şyğatyn azamattar barlyq qajettı qūjattardyñ, şaqyrulardyñ, eñbek şarttarynyñ jäne rūqsattardyñ zañnama talaptaryna säikes dūrys räsımdelgenıne aldyn ala köz jetkızuı qajet.
Jappai toptyq saparlardy ūiymdastyruşylarmen uağdalastyqty tekseru, sondai-aq keleñsız jağdailarğa arnaiy ıs-qimyldardy josparlau öte mañyzdy. Mysal retınde jaqynda bolğan rezonansty ahualdy atap ötuge bolady. Onda 200-den astam qazaqstandyq student AQŞ-ta üisız-küisız qalğan bolatyn. Baqytymyzğa orai qazırgı uaqytta barlyğy da Qazaqstanğa oraldy.
Qazaqstannyñ diplomatiilyq ökıldıkterı men konsuldyq mekemelerı öz qūzyretı şegınde azamattarğa qajettı konsuldyq-qūqyqtyq kömek körsetetının erekşe atap ötkımız keledı. Sonymen bırge bolu elınıñ zañnamasyn saqtau jäne belgılengen talaptardy oryndau üşın jauapkerşılık tıkelei azamattyñ özıne jükteledı.
Derekköz: QR SIM