Düniejüzı qazaqtarynyñ qauymdastyğy men «Otandastar qory» jūmysynyñ bağyt-bağdaryn qandastarğa tüsındıru maqsatynda arnaiy kezdesu ūiymdastyryldy. Jiynğa qatysuşylar oilaryn ortağa salyp, özderıne körsetılgen qoldauğa alğysyn bıldırdı.
Düniejüzı qazaqtarynyñ qauymdastyğy keñesşısı Latifa Mūqaşqyzy qandastarğa jyly lebızın bıldırıp, şetten kelgen ağaiynğa kömek körsetıletının atap öttı. Qarağandy filialynyñ basşysy Merueş Başaiqyzy qoiğan sūraqtarğa jauap berıp, jūmys täjıribesımen bölıstı. Altyn Mädenqyzy Aqmola oblysynda qandastarğa arnap kvota bölıngenın habarlady.

«Qadırmendı qandastar, köpten añsap kütken Atajūrtqa kelıp, taban tıredıñızder. El ışı altyn besık, daladai darhan qazaq halqy qūşağyn aiqara aşty, jatsynbady. Qazaqstannyñ qai aimağynda tūramyn, qaidan üi satyp alamyn, käsıp aşyp, nemen ainalysamyn deseñız de erkıñız, tañdau qūqyğy özıñızge berılgen. Köñılge bır demeu, Sızder ūrpaq qamy, balalaryñyzdyñ bolaşağy üşın elge keldıñızder. Būl aituğa oñai bolğanymen ülken täuekeldı, erık-jıgerdı qajet eterı sözsız. Elge köşemız dep şeşım qabyldağanda bükıl jağdaidy eskerıp, bärın tarazyğa salyp, qaşan ornalasyp, belgılı bır jerge taban tıregenşe qandai qiyndyqtar bolatynyn eskerdıñızder. Allanyñ berer nesıbesı qai elde ömır sürseñız de bırdei. Kvota bölıngen bes oblysqa köşıp barsañyzdar qanşama jeñıldıkterge ie bolasyzdar, - dedı Düniejüzı qazaqtarynyñ qauymdastyğy Astana jäne Aqmola oblysy filialynyñ basşysy Qarlyğaş Bekpatşaqyzy.