Qandastarymyzdyñ azamattyq aluyn barynşa jeñıldetu qajet - deputat

17 Aqpan, 2020

Şet elderdegı qandastarymyzdy atajūrt – Qazaqstanğa oraluğa şaqyru Tūñğyş Prezidentımız – Elbasynyñ saisi-äleumettık mañyzy zor, batyl da dana şeşımı bolğandyğy sözsız. Sonyñ arqasynda 1 millionnan astam etnikalyq qazaq elımızdıñ Täuelsızdıgı jyldary tarihi Otanyna köşıp kelıp, jas memleketımızdı nyğaituğa ölşeusız üles qosty.

Memleketımız qandastarymyzdyñ qūqyqtaryn qorğau, olarğa äleumettık qoldau körsetu mäselelerıne ūdaiy köñıl bölıp, qoldanystağy köşı-qon zañnamasy uaqyt talabyna sai jetıldırılıp keledı.

Ötken jyly Ükımet äzırlep, Parlament Mäjılısınıñ qarauyna ūsynğan «Qazaqstan Respublikasynyñ keibır zañnamalyq aktılerıne köşı-qon prosesterın retteu mäselelerı boiynşa özgerıster men tolyqtyrular engızu turaly» Zañ jobasynda atajūrtqa oralğan ağaiyndardyñ Qazaqstan Respublikasynyñ azamattyğyn aluyn odan ärı jeñıldetuge bağyttalğan jaña normalar bar.

Mäselen, qandastarymyzdyñ «oralman» märtebesın jäne Qazaqstan azamattyğyn aluğa qajettı qūjattardy bır mezgılde, iğni būrynğydai ekı ret emes, bır-aq ret tapsyruy közdelıp otyr. Sondai-aq köşı-qon, salyq jäne eñbek zañnamasyn būzuşylyqqa jol berıp, äkımşılık jazağa tartylğan qandastarymyzdyñ Qazaqstan azamattyğyn aluyna qoiylğan şekteu alynyp tastalmaqşy.

Alaida, atalğan Zañ jobasyn talqylau jönındegı jūmys tobynyñ otyrystarynda qandastarymyzdyñ Qazaqstan azamattyğyn aluyna älı de eleulı qiyndyq tudyryp, äure-sarsañğa tüsırıp kele jatqan tağy bır özektı mäsele barlyğy anyqtaldy. Ol – ışkı ıster organdarynyñ tūraqty tırkeudı talap etuı.

Osyğan bailanysty şet elderden köşıp kelgen etnikalyq qazaqtardyñ köpşılıgı tūrğyn üi satyp aluğa mümkındıkterı bolmağandyqtan, özderın jekemenşık tūrğyn üilerı men päterlerıne tūraqty tırkeuge rūqsat beretın adamdardy ızdep, sol üşın olarğa edäuır aqy tölep, şyğyndanuğa mäjbür. Būl azdai, keiın köşı-qon polisiisynyñ qyzmetkerlerı qandastarymyzdyñ tırkelgen baspanalarynda tūrmaityndyğyn äşkerelep, olarğa aqşalai aiyppūl salyp, qosymşa şyğyndandyryp jatady. Mūnyñ özı köşı-qon polisiisynyñ keibır qyzmetkerlerınıñ sybailas jemqorlyqqa ūrynuyna jağdai tuğyzatyndyğy da jasyryn emes.

Osy problemany şeşu üşın qoldanystağy köşı-qon zañnamasyna qosymşa tüzetu engızu talap etılmeidı, keibır normativtık-qūqyqtyq aktılerge ğana özgerıster engızu qajet. Atap aitqanda, Işkı ıster ministrınıñ şeteldıkterge jäne azamattyğy joq adamdarğa Qazaqstan Respublikasynda uaqytşa jäne tūraqty tūruğa rūqsattar beru qağidalaryn bekıtu turaly 2015 jylğy 4 jeltoqsandağy №992 būiryğyna, sondai-aq Qazaqstan Respublikasynyñ azamattyğyna qabyldau mäselelerı boiynşa ötınışhattardy ışkı ıster organdarynyñ qabyldau, resımdeu jäne qarau qağidalaryn bekıtu turaly 2016 jylğy 28 qañtardağy №85 būiryğyna tiıstı tüzetuler engızu qajet.

Osy mäsele boiynşa bız, «Nur Otan» partiisy fraksiisynyñ müşelerı bolyp tabylatyn bır top deputat Ükımetke hat joldap, qandastarymyzdyñ Qazaqstan Respublikasy azamattyğyn jeñıldetılgen tärtıppen aluyna eleulı kedergı bolyp otyrğan tūraqty tırkeudı talap etudı alyp tastaudy, nemese osy problemany şeşudıñ basqa ūtymdy tetıgın jasap, qoldanudy sūradyq.

QR Parlamentı Mäjılısınıñ deputaty Kärıbai Mūsyrmannyñ Feisbuk äleumettık jelısındegı paraqşasynan