Ūlttyq önerdı, ūlttyq sportty nasihattau - Asyl Ahmetovanyñ maqsaty

30 Qyrku'i'ek, 2024

KAZINFORM — Auyldağy ömırdı bükpesız jariilap, äleumettık jelıde jylqyşy qyz retınde tanylğan Asyl Ahmetova qazır Soltüstık Qazaqstan oblysy Lobanovo eldı mekenınde ūstaz bolyp eñbek etedı. Ömırge qūştar boijetken biyl tūrmys qūrdy. Endı joldasymen bırge auyl balalaryna ūlttyq oiyndardy — sadaq atudy, sonyñ ışınde jamby atudy üiretıp jatyr. Äleumettık jelıde de belsendı, ūlttyq bolmysymyzdy nasihattap keledı.

— Asyl, äleumettık jelıge qalai keldıñız? Alğaşqy tanymaldylyq qai kezde, qai jazbañyzdan keiın keldı?

— Qatelespesem 2020 jyl bolatyn, TikTok jelısı qarqyndy damyp kele jatty. Bırde üidıñ şaruasyn ıstep jürıp, video tüsırıp, äleumettık jelıge sala bastadym. Jazbalaryma jūrttyñ qyzyğuşylyğyn baiqadym. Keiın mınıp jürgen jylqymmen bır video tüsırdım. Sol beinejazba köbıne ūnady. Şöp, su tasyp jürgen beinejazbalarym boldy, auyl ömırın şynaiy körsetuge tyrystym, solardy körıp oqyrmandarym jaza bastady.

— Jylqyşynyñ qyzy bolğandyqtan attyñ qūlağynda oinaisyz ba, älde basqa sebebı bar ma? Jalpy neşe jasyñyzda atqa otyrdyñyz?

— Negızı bes jasymda atqa otyrdym. Äkem janynan qaldyrmai özımen bırge ertıp jürdı. Sol kezden qyzyğuşylyğym, jylqy malyna degen süiıspenşılıgım oindy. Mektepte oqyp jürgende keide äkemnıñ ornyna mal bağuğa baratynmyn.

bloger

— Blogerlıkten basqa tağy qandai hobbiıñız bar? Sadaq atasyz, än aitasyz, motosikl jürgızesız — bız bılmeitın tağy qandai qyrlaryñyz bar?

— Oqyrmandarymnan qūpiim joq, olar barlyq qyrymdy bıledı. Öitkenı bar bıletınımmen bölıskım keledı äleumettık jelıde, sondyqtan basqa jasyryp jürgen talantym joq. Sahnada än aitu bala kezden armanym edı, qazır hobbige ainaldy. Audanda bır ıs-şaralar bolğan jağdaida şaqyrady, sol kezde än aitamyn.

kerei qyz

— Blogerlık negızgı qyzmetıñızge kedergı keltırmei me? Bırde Astanada, endı bırde Almatyda jüresız. Oquşylaryñyz jalpy sızdıñ tanymaldyğyñyzdy qalai qabyldaidy?

— Ūlttyq önerdı, ūlttyq sportty nasihattap, balalardyñ qyzyğuşylyğyn oituymyz kerek. Būl bızdıñ bır missiimyz dep bılemın. Balalar estıgennen görı, körgenın tez jadynda saqtaidy. Ülgı bolyp, qyzyğuşylyq tudyru — maqsatym.

bloger

Türlı forumdarğa, respublikalyq ıs-şaralarğa şaqyrtu alğan kezde jūmystan sūranuğa tura keledı. Keiın balalarmen sabaqty quyp jetuımız kerek. Bıraq kedergıden görı menıñ tanymaldylyğymnyñ oñ äserı bar dep oilaimyn. Ärıptesterım bolsyn, oquşylar bolsyn ünemı qoldap tūrady.

— Qazır 68 myñ oqyrmanyñyz bar eken. Sızdı negızınen kım oqidy?

— Köbıne özımızdıñ Soltüstık öñırdıñ tūrğyndary oqidy. Sosyn Almaty men Astanadan oqyrmandarym basym. Jasyna keler bolsaq — 18 ben 25 jas aralyğynda.

Şetelden jazady, «Qazaqstanğa kelıp, körgımız keledı» dep. Aldynda Daniidan kelgen qyzdy kütıp aldyq. Köşpendıler oiyndary bızdıñ auyldan Ūly dala joryğymen bastalğannan keiın şeteldıkter köp keldı, olarmen tanystyq, saltymyz ben mädenietımızdı körsettık.

bloger

— Osy Köşpendıler oiynyn bızdıñ elde ötkızudı kezınde sız ūsynğan ekensız. Dübırlı doda köñılıñızden şyqty ma?

— Osydan ekı jyl būryn Zerendıde ötken forumda Köşpendıler oiynyn bızde ötkızu turaly ideiny aitqan edım, sol kezde joğary deñgeide ötkıze alamyz ba degen oi boldy. 2024 jylğa deiın ülgeremız be, qai qalada ötedı degen sūraqtar mazalady. Astana men Türkıstan qalalarynyñ arasynda tañdau tūrdy. Mağan bärı ūnady. Aşyluynda da boldym, barlyğy qazaq tılınde öttı. Alğaş ret ūiymdastyrylğandyqtan mümkın kemşılıkter bolğan şyğar, bıraq özım baiqamadym. Eñ bastysy — Qazaqstanymyzdy köptegen elder kördı, qonaqtardyñ bärıne ūnady.

— Tūrmys qūrğanyñyzdy bılemız. Otbasylyq ömırge bailanysty būrynğy ömır süru saltyñyzdy özgertu oiyñyzda joq pa?

— Joldasym menı osy ıste qoldaidy. Ol da jylqy malyn jaqsy köredı, kökpar oinaidy. Qazır ekeumız bırge sadaq atu üiırmesın aşyp jatyrmyz. Memleketten da, jergılıktı atqaruşy bilıkten de, mektebımnen de qoldau bar. Jamby atudy, audaryspaq oiynyn üiretemız, balalar bos jürmesın degen maqsat. Enem de at qūlağynda oinaidy, kezınde qyz quu oiyndaryna qatysqan. Sondyqtan menı ol da ünemı qoldaidy. Keibır ıs-şaralarğa barmaimyn desem, kerısınşe qatysqanymdy tılep, aityp otyrady.

bloger

— Bır beinejazbada şauyp kele jatqan attyñ üstınde tık tūrğanyñyzdy kördım, mūndai qauıptı jattyğulardy jasauğa qoryqpaisyz ba?

— Atqa är mıngen saiyn qorqamyn. Ne degenmen januar ğoi, ürkuı mümkın, sondyqtan saq otyru qajet. Tazym bar, laika tūqymdas «Moinaq» atty itım bar. Jalpy jan-januardy jaqsy köremın.

bloger

— Bır sūhbatta öz şaruaşylyğymdy qūrğym keledı degen ekensız, jalpy qandai armanyñyz bar?

— Qazır köpşılık özı ūnatqan käsıbın aşyp jatyr. Men de öz şaruaşylyğymnyñ bolğanyn qalaimyn. Ūlttyq sport, sonyñ ışınde jylqymen bailanysty sportqa ketkım keledı. Jylqy malyn köbeitıp, şäkırt tärbieleu oiymda bar. Qazır oquşylarğa arnap üş jylqy ūstap otyrmyz. Qazır men mektepten bölık kolledjde de eñbek etemın. Osy kolledjde basqa audannan, öñırlerden kelgen balalar oqidy. Qazaqstannyñ batysynan köp. Oquşylardyñ da, studentterdıñ de qazaqy önerge qyzyğuşylyğy joğary. Üirenem, atqa otyramyn degen balanyñ betın qaqpai, bärın üiırmege alyp jatyrmyz. Būiyrtsa jarystarğa şyğu da josparymyzda bar.

 

Avtor

Aqerke Däurenbekqyzy