Ағымдағы жылдың 4 наурызында Еуразиялық экономикалық комиссия Алқасы жанындағы Мұнай және газ жөніндегі Консультативтік комитеттің кезекті отырысы өтеді.

Отырыс шеңберінде Консультативтік комитеттің мүшелері ағымдағы жай-күйді талдауды және осы саладағы ынтымақтастықты дамыту үшін одан әрі қадамдарды айқындауды қоса алғанда, газ, мұнай және мұнай өнімдерінің ортақ нарығын қалыптастыру барысын қарайды.

Естеріңізге сала кетейік, қолданыстағы уағдаластықтар шеңберінде ЕАЭО-ға қатысушы елдер үшін энергетикалық ресурстардың (электр энергиясы, газ, мұнай және мұнай өнімдері) ортақ нарықтарын құру 2025 жылдан бастап жоспарланған болатын.

Сонымен қатар, ЕАЭО-ға қатысушы елдер газ, мұнай және мұнай өнімдерінің ортақ нарығын енгізу мерзімін ауыстыруды талқылауды жоспарлап отыр, өйткені қазіргі уақытта Нормативтік-құқықтық актілердің әзірленген жобалары толыққанды қабылдау үшін әзірліктің жеткіліксіз деңгейінде тұр және тараптар арасында одан әрі консультацияларды талап етеді.

Жалпы, ЕАЭО газ, мұнай және мұнай өнімдерінің ортақ нарығын құру еуразиялық кеңістіктегі интеграциялық процестерді дамытудың маңызды кезеңдерінің бірі болып табылатынын атап өтеміз.

Ортақ энергетикалық нарықтарды қалыптастыру ЕАЭО-ға мүше мемлекеттердің аумағы бойынша энергия ресурстарының еркін қозғалысын қамтамасыз етуді, энергетика секторында бәсекелестік орта құруды, энергия тасымалдаушыларды тасымалдау және транзиттеу саласындағы табиғи монополиялар қызметтеріне тең қолжетімділікті қамтамасыз етуді, энергетикалық нарықтар инфрақұрылымын бірлесіп дамытуды және келісілген тарифтік саясатты жүргізуді қамтиды.

Қазақстан үшін энергетикалық ресурстардың жалпы нарығына қатысу энергия жеткізгіштер бағасының тұрақтылығына ықпал ететін болады, сондай-ақ Қазақстанның энергетикалық секторына инвестициялар тартуға және экспорттың жекелеген нарықтарына тәуелділікті төмендетуге жәрдемдесетін болады, бұл өз кезегінде елдің экономикалық өсуі мен дамуын қолдауға мүмкіндік береді.