2024 жылғы 30 маусымнан бастап Ресейде елге келетін шетел азаматтарына қатысты жаңа ережелер күшіне енеді. Бұл өзгерістер Қазақстанды қоса алғанда, Ресей Федерациясымен визасыз режимі бар елдердің азаматтарына қатысты, деп хабарлайды BöriTimes inbusiness.kz сайтына сілтеме жасап.

Қазақстан азаматтары Ресейге кіруге 72 сағат қалғанда сапар мақсаты туралы алдын ала өтініш беруге міндетті. Дербес жағдайларда, мысалы, жақын туысының ауырып қалуы немесе қайтыс болуы секілді себептер бойынша өтінішті елге келуге 4 сағат қалғанда беруге рұқсат етіледі.

Өтінішті Госуслуги RuID деп аталатын арнайы мобильді қосымша арқылы беру қажет. Алайда бұл қосымша әзірге әзірлеу сатысында, сондықтан App Store, Google Play Store және басқа қосымшалар дүкендерінде қолжетімді емес.

QR-код алу үшін сапар мақсатын көрсету, жеке деректердің барлық жолдарын толтыру, фотосурет жүктеу және елде болу мерзімін көрсету қажет.

Құқық қорғаушылар шекарада интернетке қосылу қиындықтары туындауы мүмкін екенін ескере отырып, QR-кодтың скриншотын алдын ала сақтап қоюды ұсынады. Сарапшылар Ресейдің Орталық Азия елдерімен электронды виза режимін іс жүзінде енгізіп жатқанын атап өтеді.

QR-кодсыз елге тек виза алған азаматтар, дипломаттар, 6 жасқа дейінгі балалар, ықтиярхат немесе тұруға рұқсаты бар тұлғалар және Беларусь азаматтары кіре алады. Өзге шетел азаматтарына, егер Госуслуги RuID қосымшасы уақытылы іске қосылмаса да, алдын ала өтініш пен QR-кодсыз кіруге тыйым салынады.

Дегенмен QR-кодтың болуы Ресейге кіруге кепілдік бермейді — түпкілікті шешімді шекара қызметі қабылдайды. Биометриялық деректер сәйкес келмеген жағдайда елге кіруге тыйым салынуы мүмкін.

2025 жылдың басынан бастап Қазақстан азаматтарының Ресейде уақытша болу мерзімі күнтізбелік жыл ішінде жалпы алғанда 90 күнге дейін қысқартылады. Ал 30 маусымнан бастап Ресейдің барлық шекаралық бекеттерінде қазақстандықтардың биометриялық деректері жиналатын болады.

Қазақстан Республикасының Елшілігі сапар алдында кіруге рұқсаттың бар-жоғын тексеруге және шекарада қосымша рәсімдерден өтуге дайын болуға кеңес береді.