21-ақпан - «Халықаралық ана тілі» күні - 1999 жылғы  қарашада ЮНЕСКО-ның Бас Конференциясы 30-ыншы сессиясының шешімімен бекітілген және 2000 жылғы ақпанның 21-інен бастап тілдік және мәдени әр алуандықты қорғау мақсатында атап өтіледі.

Осы атаулы күнге орай мемлекеттік тілдің мерейін асырып, ана тілімізді ардақтау мақсатында «Шығыстың Аристотелі» атанған ғұлама ойшыл Әбу-Насыр әл-Фарабидің 1150 жылдығы және ұлтымыздың ұлы тұлғасы Абай Құнанбаевтың 175 жылдығына орай Дүниежүзі қазақтары қауымдастығымен бірлесе отырып, «Отандастар қоры» КЕАҚ-ның Мәдени-гуманитарлық жобалар департаменті  2020 жылғы 1-15 ақпан аралығында алыс-жақын шет елдердегі этникалық қазақ балалары  арасында  қандастардың қазақ тілі мен әдебиетіне құштарлығын арттыра түсу үшін халықаралық шығармашылық байқау жариялайды.

«АНА ТІЛІМ - АРДАҒЫМ» халықаралық байқауының басты шарты:

-    Байқау талабына сай жазылған шығармалар «Отандастар» қорына электронды пошта арқылы жолданады. Электронды адрес: info@oq.qov.kz; serik_abduali@mail.ru

-    Байқауға алыс-жақын шет елдердегі этникалық қазақ балалары  (8-11 сынып оқушылары)  - қандас ұл-қыздар қатыса алады;

-    Байқауға қатысуға талапкер оқушылар «Отандастар» қорына «Шығыстың Аристотелі» атанған ғұлама ойшыл Әбу-Насыр әл-Фарабидің 1150 жылдығы және  ұлтымыздың ұлы ақыны, қазақ жазба әдебиетінің негізін қалаушы, философ Абай Құнанбаевтың 175 жылдығына арнап өзінің ой-толғамын шағын шығарма етіп жазуы тиіс. Ұлтымыздың ұлы тұлғаларын ұлықтап, олардың өнегелі өмір жолы мен өміршең туындылары туралы  шығарманы қара сөзбен немесе өлең жанрында жазуға болады. Көлемі А4 форматындағы 2 беттен аспауы керек;

-    Шығарма авторы өзінің аты-жөні, туған жылы, айы, күні, тұрғылықты мекен-жайы және жеке басына қатысты мәліметтерді жеке парақта, бөлек жазуы тиіс;

-    Байқауға жолданатын шығармаларды қабылдаудың межелі мерзімі: 1 ақпан - 15 ақпан аралығы; 

-    Байқауға жолданған шығармаларды білікті тіл-әдебиет мамандарынан құрылған қазылар алқасы іріктеп-сұрыптап, ең үздік деп танылған 6 (алты) туындының авторы жүлдегерлер деп танылады.

-    Жүлделі орындар: I орын - біреу; II орын - екеу;  III орын - үшеу, барлығы 6 жүлде.

-    I орын - «Туған елге саяхат» туристік пойызына 1 (бір) жолдама;  
-    II орын - Бурабайдағы «Балдәурен» балалар лагеріне 2 (екі) жолдама;
-    III орын - НЗМ (НИШ) лагеріне 3 (үш) жолдама (Нұр-Сұлтан қаласы).

-    Жүлдегерлердің Қазақстанға келіп-кету жолақысы және күтіп алу-шығарып салу шығыны «Отандастар» қоры есебінен төленеді.

-    Жеңімпаз бен жүлдегерлер 20 ақпанға дейін анықталып, үздік үштікке енгендердің есімі 21 ақпан - Халықаралық Ана тілі күнінде жария етіледі және Қор сайты мен әлеуметтік желілерде жазылады.

-    Байқау туралы ақпараттық материалдар «Отандастар» сайтына және oq-bilim.kz, сондай-ақ әлеуметтік желілерде орналастырылады.