ПБК «Астана» және «Отандастар қоры» КеАҚ екіжақты ынтымақтастық туралы меморандумға қол қойды. Құжатқа қол қоюдың салтанатты рәсімі іскерлік кездесу аясында өтіп, оған ПБК «Астана» бас директоры Самсон Аракелян мен «Отандастар қоры» КеАҚ президенті Данияр Қадыров қатысты.

Қол қойылған меморандум спорттық бастамаларды дамытуға, жастарды қолдауға және бірлескен іс-шараларды өткізуге бағытталған. Студент-қандастарды қолдауға, олар үшін спортта өзін-өзі дамытуға мүмкіндік жасауға және спорттық жетістіктері арқылы тарихи отанымен байланысын нығайтуға ерекше көңіл бөлінеді. Кездесу барысында тараптар қазақстандық спортты дамыту және жастарды белсенді әрі салауатты өмір салтына тарту саласындағы серіктестіктің маңыздылығын атап өтті.

Ынтымақтастық аясындағы алғашқы бірлескен спорттық іс-шара 2025 жылдың 13 сәуіріне жоспарланған. ПБК «Астана» қолдауымен қандас студенттер арасында 3х3 олимпиадалық форматындағы баскетбол турнирі өтеді. Бұл шара спорттық байланыстарды нығайту мен жас таланттарды қолдау жолындағы маңызды қадам болмақ.

ПБК «Астана» және «Отандастар қоры» КеАҚ аталған ынтымақтастықтың ұзақ мерзімді болатынына және Қазақстандағы спорттың дамуына елеулі үлес қосатынына сенімді. Сондай-ақ, бұл серіктестік қандас студенттердің спорттық рухын нығайтуға, олардың әлеуетін ашуға және елдің спорттық қауымдастығына сәтті бейімделуіне ықпалын тигізеді деген болжамда.

 

ПБК «Астана» бас директоры Самсон Аракелян:
— Біздің ынтымақтастығымыздың негізгі бағыттарының бірі – баскетболда талантты этникалық қазақтарды тарихи отанына шақыру. Қазақстан халықаралық турнирлерде ұлттық туды лайықты қорғай алатын жергілікті спортшылардың тапшылығына тап болып отырғаны жасырын емес. Қытайда, Моңғолияда және Ресейде тұратын этникалық қазақтардың жоғары деңгейде жаттығып, өнер көрсету мүмкіндігі бар, бұл олардың болашақта Қазақстан құрамасы мен ПБК «Астана» клубының сапында ел намысын қорғауына жол ашады. Бұл үдерісте Отандастар тарапынан құқықтық және ақпараттық қолдау маңызды рөл атқарады.

«Отандастар қоры» КеАҚ президенті Данияр Қадыров:
— Спорт әрдайым біріктіруші күшке ие. Ол шекараларды жояды, адамдарды жақындастырады және жастардың әлеуетін ашуға көмектеседі. Біздің ортақ мақсатымыз – студент-қандастарымыздың өзін-өзі дамытуына жағдай жасау, олардың әрқайсысына қажетті қолдау көрсету және қазақстандық спорттың дамуына үлес қосуына мүмкіндік беру. ПБК «Астана» серіктестерімізге ынтымақтастыққа ашық болғаны және бірлесіп жұмыс істеуге дайын болғаны үшін алғысымды білдіремін.