Құрметті қонақтар, қадірлі отандас ғалымдар, әріптестер!

«Отандас ғалымдар форумына» қош келдіңіздер! Назарбаев университетінде сіздерді қарсы алу - біз үшін үлкен мәртебе. Бүгін біз шетелден келген 40-тан астам белгілі ғалымды және Қазақстанның түкпір-түкпірінен жиналған 100-ден астам қатысушыны қабылдап отырмыз. Бұл - өте маңызды әрі уақыт талабына сай шара.

Бұл форум жай ғана академиялық кездесулер алаңы емес. Ол - білім, ұлттық бірегейлік және елдің стратегиялық дамуы тоғысатын кеңістік. Қай елде өмір сүрсе де, тамыры Қазақстанға байланған, ғылыми жетістіктерін ел игілігіне бағыттауға құлшынысы бар отандас ғалымдарды тоғыстыратын алаң.

«Отандас ғалымдар форумының» нақты мақсаты бар: әлемнің әр түкпірінде жүрген отандастардың ғылыми жетістіктерін таныстыру, олар мен қазақстандық ғылыми қауымдастық арасында тұрақты байланыс орнату, еліміздің ғылым мен инновация саласындағы жаңа саясаттары мен басым бағыттарымен бөлісу, бірлескен зерттеулер мен академиялық ұтқырлыққа жол ашу.

Бүгін біз шекарадан тыс байланысқан ғылыми қауымдастықтың күшін көріп отырмыз. Германия, АҚШ, Жапония, Түркия, Корея, Моңғолия және басқа да елдерден келген ғалымдар - қазақ ғылымының жаһандық деңгейдегі ауқымын көрсетеді. Сіздер талқылайтын тақырыптар - жасанды интеллекттен бастап, жасыл энергия, цифрлық медицина, қоғамдық денсаулық, инновациялық материалдар, жайылым шаруашылығын тұрақты дамытуға дейін - елдің болашағы үшін аса маңызды бағыттар.

Қазақстанды ғылым, технология және инновация саласында өңірлік көшбасшы етуге ұмтылған ұлттық зерттеу университеті ретінде біз жаһандық ынтымақтастыққа негізделген ашық ғылыми экожүйе құруға белсенді атсалысудамыз.

"100 ғалым" жобасы, халықаралық ғылыми бағдарламалар, Qazaq International Science and Technology Association сияқты бастамалар арқылы біз әлемдегі қазақ ғалымдары үшін ортақ ғылыми кеңістік қалыптастырудамыз.

Бір нәрсені ерекше атап өткім келеді: біздің университеттің есігі сіздер үшін әрқашан ашық - бірлескен зерттеу, тәлімгерлік, оқыту, инновациялық жобалар болсын, барлығы үшін.

Бұл форум - жалғыз шара емес. Бұл - Қазақстан мен әлемдегі қазақ ғалымдарының тұрақты әрі стратегиялық жаңа серіктестігінің бастауы. Бұл елдің интеллектуалды диаспорасымен байланысты жаңа деңгейге көтеретін тарихи қадам.

Сіздердің тәжірибелеріңіз, ғылыми байланыстарыңыз, жаһандық көзқарастарыңыз - Қазақстан ғылымының келесі кезеңін қалыптастыруға өлшеусіз үлес.

Назарбаев университеті атынан барлығыңызға зор алғыс айтамын. Бүгінгі форумға қатысу арқылы сіздер біздің ортақ болашағымызға сенім білдіріп отырсыздар.

Баршаңызға жемісті пікірталас, шабытты идеялар, табысты ғылыми әріптестік тілеймін.

Назарбаев университетіне қош келдіңіздер! Рахмет!