Таныс болыңыз: Мерей Сламұлы

05 Қазан, 2020

«Отандастар қоры» дүниежүзінің әр еліне тарыдай шашырап, кейін атажұртты аңсап Қазақстанға көшіп келген қандастарымыз туралы арнайы «Таныс болыңыз» жобасын бастаған еді. Сол жобаның жалғасы ретінде таныс болыңыздар – белгілі кәсіпкер, меценат Мерей Сламұлы.

Мерей Сламұлы – белгілі кәсіпкер, меценат. 1963 жылдың 20 қаңтарында ҚХР Шиньжян Ұйғыр Автономиялық Районы, Құтыби ауданына қарасты Торғайты елді мекенінде дүниеге келген. Бастауыш мектепті Торғайтыда оқып, орта мектепті Құтыби ауданында бітірген. 1982-1986 жж. Қытайдың әйгілі Нанкин Университетінің Биология факультетінде Ботаника мамандығы бойынша білім алған.

1986-1992 жж. Қытай Ғылым Академиясы, Шиньжяң бөлімшесі, Биология Топырақ-Құм Зерттеу Институтында жұмыс істеген. Осы жылдары «Тянь-Шянь таулы өсімдіктер экологиясын зерттеу» және «Байымбұлақ таулы өсімдіктердің экологиялық жағдайы» атты ғылыми тақырыптар бойынша Шиньжян Ғылыми Жаңа Техникалық үздіктер байқауында үшінші дәрежеде марапатталған.

1992 жылы атамекенге оралып, 1992-1995 жж. Қазақстан Ғылым Академиясы, Ботаника Институтында аспирантурасында білімін толықтырды.

2000 жылдардан бастап Қытай Келун Корпорациясының Қазанстан Республикасында ресми өкіл қызметін атқарып, екі ел арасындағы дәрі-дәрмек өндірісінің негізін қалады.

2012 жылдан бастап Келун Корпорациясымен бірлесіп Алматы облысы, Карасай ауданы, Көкөзек ауылында Келун-Казфарм Бірлескен Дәрі Өндіруші Зауытын құрады. Қазақстан жағының жауапты қурылтайшысы болып, өндіріс бастайды. Қазіргі кезде аталған зауыттың атқарушы директоры.

Зауыт – орта Азиядағы ең көлемді өндіріс орны. Жылдық өнімі 60 миллион ерітінді флокон және 60 миллиондық онкологиялық дәрі құтысын шығарады.

Құлағанды сүйеп, жылағанды уатып, жоқ-жітікке көмектесіп қамқорлық көрсету Мерей Сламұлының дағдылы әдеттерінің бірі. Көптеген ақын, жазушылардың кітабының баспадан шығуына себепкер болған ол қазақ руханиятының дамуына да бей-жай қарамайды.

Ата-баба аруағына тағзым етіп, көне жазбалар мен шежірелердің жарық көруін, оның ел игілігіне жарауына жәрдем етіп, Қазақстанның түгенделіп жатқан тарихын толықтыруға да аянбай үлес қосып келеді.

Асыл жары – Халида Дүкеқызымен бірге Қарылғаш, Қаламқас есімді екі қызын тәрбиелеп өсіріп, үлгілі отбасын құруда.

Таныс болыңыз: Мерей Сламұлы